Shillong: Mynta ka sngi, ki nonghikai ka skulbah NEHU kila iakynduh ia u Lat ka jylla u CH Vijayashankar ha Raj Bhavan Shillong ban pynsngew ia ka kynrum kynram hapoh ka skulbah.
Haba kren sha ki lad pathai khubor, u Prof. Lakhon Kma uba dei u President ka NEHUTA u la ong ba ka jingiakynduh bad u Lat ka long kaba sngew tynnad ha kaba u la pynpaw ba un shim khia ban don ka jingiakren hapdeng baroh, ban pynbeit ia ka jingeh. Ka jingiakynduh bad u Lat ka long kaba don jingmut namar ba ula kular ban shim khia ia kane ka jingeh.
U la ong ba ki nonghikai kim shym la ai kano kano ka jingmut ne kano kano ka jingdawa ban weng ne pynneh ia u Vice Chancellor ne ban ong leh ia kane ne leh ia katai hynrei ka jingkynduh ka long ban pynpaw ia ka jingsngew khia jur halor ka jinglong jingman ha NEHU.
Ban weng ia u Vice Chancellor ka shong ha ka president ka ri India bad kawei pat ka shong ha ka jingsngew kitkhlieh jong u VC lada u kwah ban hiar shuki hi da lade.
Hynrei ha kajuh ka por, u la ong ba haduh mynta u VC um shym la jubab halor ka jingdawa ne ban khot ban iapynbeit ia ka jingeh khamtam halor ka jingiakhih jong ki samla pule kaba dang iaid haduh mynta.
Kyrmen ki nonghikai ban pynbeit ia ka jingeh NEHU hadien ba kynduh ia u Lat
