Shillong: U Chief Executive Member ka Khasi Hills Autonomous District Council, u Bah Pyniaid Sing Syiem mynta ka sngi ula iathuh ba ka Council ka sngewshngain ba ka la don ki ain ki bakhlain ban iada ia ka jaitbynriew Hynniewtrep bad ban peit ruh ia ka khuid ka suba jong ki shnong ki thaw, ki it ki hima bad Elaka.
U Bah Syiem u la iathuh ia kane kane, haba u la pyllait paidbah ia ka kali kit niut na ka skim KHADC na ka bynta ka shnong Nongrah kaba don hapoh Shillong ha ka prokram ba la pyllong da ka Dorbar Shnong Nongrah Pyllun ha madan ialehkai phutbol jong ka shnong Nongrah, ha kaba la sakhi ruh da ki nongshong shnong. Ha kane ka sngi, ka Executive Committee jong ka Dorbar Shnong Nongrah Pyllun, ka la pynkup burom ruh ia u Rangbahdong Dong Ktieh bamynshuwa, u Bah A.S. Kharsohnoh bad ia u Bah Sanborn Jungai, uwei na ki nongshong ka Nongrah, kiba la trei shitom ban pynlong ia ka Dorbar Shnong kaba ym shym la lah ban pynlong haduh khatdar snem kynthih. Dei lyngba jong ki ba ka shnong la lah pat ban pynlong ia ka Dorbar Shnong bad ia ka jingjied ia ka Executive Committee bathymmai hapoh ka jingialam jong u Rangbah Shnong u Bah D.R. Lynrah. Haba kren ha katei ka sngi, u Bah Syiem u la iathuh ba ia katei ka trok kit niut kaba shondor kumba 17,00,000 tyngka la ai na ka skim KHADC lyngba ka 15th. Finance Commission Grant. U Bah Syiem ula iathuh ruh ba ka Nongrah kan sa ioh ia artylli ki surok rong ba kylluid bad mynta ka jingshna ia ki nala bad kiwei ki jingdonkam ki dang iaid shaid shaid. U CEM u la iathuh ruh ba ka KHADC nalor ba ka ai Sanad ia ki Syiem bad ki Sordar, mynta kan sa ai ruh ia jingithuh ia ki Rangbah Dong, ki Seng Kynthei bad Seng Samla khnang ba kane kan ym buh jingeh ia ki ha kaba iatyngkhuh bad ka ain na ka daw ba ki trei na ka bha ka miat jong ka shnong ka thaw bad ka imlang sahlang.
U Bah Pynshai u la iathuh ruh ba ki nongshnong hapoh ka KHADC kim don kam shuh ban leit Register ia ka khyndew ka shyiap ka jong ki bad ka Sorkar Jylla bad ki lah ban leh ia kane lyngba ki bor jong ka Council.
Ia kane ka jingialang la pyniaid da u Rangbah Shnong, u Bah D.R.
Lynrah.
Haba kren ha katei ka sngi, u Secretary jong ka shnong Nongrah, u Bah P. Pyngrope u la pynpaw ia ka jingsngewnguh bad sngewburom ia u Chief Executive Member, u Bah Pyniaid Sing Syiem na ka skim pynioh kali theh niut bad kiwei ki kam pynroi na ka bynta ka shnong. U Bah Pyngrope u la iathuh ruh ba ka kam nongmihkhmat bad ban kot shaduh ka kyrdan Chief Executive Member (CEM) jong ka KHADC kam long kaba suk bad pynsngew ruh ia ki kyntien phira kiba ong ba, “Ka bor ka iktiar ka bud ryngkhih ruh bad ka jingkitkhlieh”. La pdiang sngewbha ia kane ka prokram da u Rangbah Dong ka Nongmarbah, u Bah S.F. Pyngrope.
Ka KHADC ka dor ki ain bakhlain ban iada ia ka jaitbynriew Hynniewtrep: CEM KHADC
