Shillong: Ka jingiakhih shah thngan ki samla pule ka skulbah NEHU ka la nang jur halor ka jingpyneh u Vice Chancellor ula kyntait ban weng kam u Registrar bad Deputy Registrar. Kane ka la pyllong ia ki samla pule ban dawa hiar shuki noh ia u Vice Chancellor u Pro. Prabha Shukla Shankar.
Mynta ka sngi, kawei ka longkmie ryngkat I khun, ka la wan ai mynsiem ia ki samla pule kiba shah thngan ha NEHU.
Ha kajuh ka por, kawei ka samla pule ka la shah rah sha jaka sumar hadien ba ka jingtlot ka la kem kynsan na ka jingshah thngan.
Ha kawei ka jingjia mynta ka sngi, ka seng ki samla pule ka NEHUSU ka la beh noh ia ki nongialam ka seng Voice of the People Party (VPP), kiba la wan ban tuklar ia katei ka jingiakhih jongki.
Hakhmat kaba don lang u Vice Chancellor, ki nongialam ka VPP, u President ka NEHUSU u samla Sandy Sohtun ula kren jam bha ba ym dei ban wan tuklar mano mano ia ka jingiakhih jongki bad ki dei ban mih na katei ka jaka bad lada kim mih, kin sa khang ia ka NEHU ba kin ym ioh mih shuh syndon.
U la ong baka jingdawa ki samla pule mynta ka long ba u Vice Chancellor u dei ban hiar shuki noh mardor, lym kumta, kin pynjur ia ka jingiakhih.
Shwa ia kane, mynta ka sngi, ki samla pule kila thang ruh ia ki tyngshop jong u VC, u Registrar bad u Deputy Registrar.
NEHU: Shah beh ka VPP, dawa hiar shuki ia u VC, wan ai mynsiem ka longkmie bad I khun, poi hospital ba shah thngan
