Shillong: Ki nongrep ka shnong Phlangkynshi ki kynduh shibun ka jingeh ha ka kit ka bah ban pynpoi ia ki mar rep na jaka rep sha shnong, naduh ba la sniew noh ka ropeway.
Ha ka jingshisha, kane ka Ropeway ka la ai ka jingshakri ban pynsuk ia ka kit ka bah na ki jaka rep kiba don jngai na ka shnong sha ki jaka them, hynrei ka jingsniew jongka, la kham katto katne snem, ka la wanrah ka jingduh nong ia ki nongshong shnong.
U Myntri kaba ju khot ha katei ka thain ia u Rangbah Shnong, u bah Polos Marngar ula iathuh ba ka jingdon ka ropeway ka la iarap shi kat dei eh ia ki nongrep ha ka kit ka bah ban pynkit na them sha shnong, hynrei naduh ba ka la sniew, ka la pynduh nong bha namar ba ki briew ki hap ban shu kit satar da ka bor met.
“Mynshwa ha ka por ba dang treikam ka Ropeway ka long ka jingmyntoi ha ka kit ka bah hynrei naduh ba ka la sniew, la shitom biang ka kit ka bah”, la ong u bah Polos.
Ka shnong Phlangkynshi ka jngai kumba 20 Km na Mawkyrwat, ka South West Khasi Hills District, bad ka dei ka shnong kaba don ki riat ki rain bad ki lum ki wah ha kaba ki briew ki hap ban hiar ia ki thiep bad kiew ia ki lum ban kit ia ki mar rep ban pynpoi sha shnong.
U Myntri ka shnong Phlangkynshi u la ong ba ka shnong ka kwah ba ka sorkar kan pynbha biang ia kane ka ropeway khnang ba kan iarap ia ki nongrep ha ka kit ka bah.
Thrang ki nongrep ka Phlangkynshi ban pynbha biang ka sorkar ia ka rope way
