Ki lad ka leit ka wan lyngba ki surok ka dei kaba kham kongsan ha India bad kane ka dang kham iar ha kaba iadei bad ka jingleit jingwan ki briew bad ka jingpynkit mar. Lyngba ka jingpyniar kaba sted ia ka rynsan jong ki surok bad ka jingbun ki kali, ha ryngkat ka jingkham sted ka leit ka wan, ki don kumba 3.5 lak ki jingiatyngkhuh kali bad 1.5 lak ki mynsiem briew ba duh man u snem bad kane ka ktah ia ka ioh ka kot kaba kumba 3% jong ka GDP. Ki jingtip shaphang ki jingiatyngkhuh kali ki pyni ba 68% ki jingduh ia ki mynsiem briew ki iadei bad ki nongpyndonkam ia ki surok kiba kham don jingma lane ki kali ar shaka, ki nongiaid lynti bad ki nongniah cycle. Ki daw kiba kham kongsan ki long ka jingpynher palat ia ki kali, ka jingbym buh jingmut ki nongniah, ka jingpyndonkam ia ki mobile bad ka jingbym sangeh ha ki sharak saw. Palat shiteng na kine ki jingduh mynsiem briew ki dei hapdeng kiba dang kham samla kiba dang hapoh 35 snem ka rta. Kumta ka long kaba donkam bha ban kyntiew ia ka jingshngain ha ki lad ka leit ka wan lyngba ki surok ban lait na ki jingktah ia ka imlang sahlang bad ruh ban pynthikna ia ka jingkiew ka ioh ka kot kaba iaineh. Hapoh ka jingialam jong u Myntri Rangbah Duh Narendra Modi bad ka jingialam jong u Myntri Sorkar Pdeng ba dei khmih ia ka tnad Road Transport & Highways, la peit bniah ia ka jingshngain ha ki surok. Ka tnad ka dang saindur ia ka skhim ba pura ban pynkhlain ia ki saw tylli ki E (Engineering, Enforcement, Education bad Emergency Care) ha ka rukom kaba iaineh ban ioh ia ki jingmyntoi na kane shuwa ban kut kine ki 10 snem.
Ki surok bah ki kynthup 2.3% jong baroh ka rynsan ki 6.3 million km ki surok hynrei 40% na ki jingtyngkhuh kali ki jia ha kine ki surok bah. Ki kali kiba iaid lyngba ki surok bah ki dei kiba pynher sted bad bun na ki, ki dei ki kali heh bad namar kane kawei na ki lai pawa ki jingduh mynsiem briew ki jia ha ki surok bah. Ka tnad ka la pynlong ba donkam ban leh ia ka Road Safety Audit ha baroh ki bynta jong ka jingpyntreikam khnang ba ym don kano kano ka projek kaba thymmai kaba don ki jingduna ha ki kam engineering. Ka tnad ka la sdang ia ka kam ha kylleng ka India ban pynduh lut ki jaka ba don jingma ha ki surok bah. Na ki 13795 tylli ki jaka ba don jingma ba la lap, ki sienjam ban pynduna ia ka jingpynher sted ia ki kali, ki jingthoh harud surok, ki sharak, ki jaka jam sha shiliang surok, ki rumble strip bad kiwei kiwei ki dei kiba la pyndep ha 9525 tylli ki jaka ba don jingma bad ia kiba dang sah la thmu ban pyndep shuwa u Lber, 2025. Ka jingpeit bniah ka la pyni ba kine ki sienjam ki la seisoh ha 85% na kine ki jaka ba don jingma bad kane ka la pynduna ia ki jingtyngkhuh kali kiba shim ia ki jingim briew ne pynmynsaw jur ia ki briew. Sa kiwei kiwei pat ki sienjam kum ka jingpynbiang ia ki jaka iaid briew bad ki jingker surok, ki jingpynbha ia ki jaka ba bun lad, ki flyover, ka jingpyniar ia ki surok, ka jingpynbeit bha ia ki surok, ki jingkieng ban iaid briew bad kiwei kiwei ki dei kiba la pyndep ha 4593 tylli ki jaka ba don jingma bad ia kiba dang sah la thmu ban pyndep shuwa u snem 2026-27. Kumba 5 km ki bynta jong ki surok bah ki bym pat don ka jingkhald briew ha kine ki 2 snem ba la dep ki don kumba 14.5% jong ka rynsan ki surok bah katkum ki jingwad bniah bad la ai jingmut ban ithuh ia kine kum ki ‘white corridor’ bad la pynshlur ia ki ophisar ba kin iada ia kine ki corridor bad pynthikna ba kine ki bynta jong ki surok kin ym sniew.
Ka tnad ka la wanrah ia ka e-DAR (Electronic Detailed Accident Report), kaba dei ka database ban ai jingtip, peit ia ka data kaba iadei bad ki jingtyngkhuh kali. La ithuh mar mar ia ki jaka ba ju kham jia ki jingtyngkhuh kali bad ki ophisar ki leit peit ia kine ki jaka ban sngewthuh lada don ki jingduna ha ka jingtrei. La wanrah ki jingpynbeit lada donkam ia kine katkum ka jingdonkam ha kine ki jaka. La pynbeit ia kumba 5446 na ki 6014 tylli ki jaka ba ju kham jia ki jingtyngkhuh kali, kumba la lap haduh u bnai Jylliew, 2024.
La sdang ia ka Bharat New Car Assessment Program (BNCAP), ka rukom buh kyrdan, kaba iahap bad ki rukom treikam ha kylleng ka pyrthei, na ka bynta ka jingpeit ia ka jingshngain jong ki kali bad ki SUV ba thymmai. U Myntri Rangbah Duh, ha ka 13 tarik u Nailar, 2021 u la plie paidbah ia ka Vehicle Scrapping Policy ban pynduh noh ia ki kali ki bym iahap shuh bad kiba pynjaboh. Ki Automated Testing Station (AT) bad ki Registered Vehicle Scrapping Facility (RVSF) ki dei kiba dang tei ha kylleng ka ri ban pynsted ia kane ka kam.
La ki surok ki dei kiba bha ne kiba sniew, ka jingpyntreikam ia ka ain bad ki kyndon ka hap hapoh ka jingpeit jong ki Sorkar Jylla. Ka tnad ka la ialam lynti bad ka la pynbna ia ki kyndon na ka bynta ka Electronic Monitoring and Enforcement of Road Safety ha kaba la pynbiang ia ki mar elektrik kum ki speed camera, ki CCTV, speed gun, dash cam, ki camera ba lah ban pyndait ha ka met briew bad kiwei kiwei. La ai jingpynbna shaphang ka jingdonkam ia ki harness/crash helmet na ka bynta ki khynnah. La kyntiew ia ki jingdain kuna bad ki jingpynshitom haba pynkhein ia ki kyndon kiba iadei bad ka jingniah kali ha ka Motor Vehicles (Amendment) Act.
Ka jingai jinghikai ia ki briew shaphang ka jingshngain ha ki surok ka long kaba donkam bha ban pynduna ia ki jingbakla haba niah kali ne iaid ha ki surok. Ka tnad ka la pynkhreh ia ki kam ban wanrah ia ki rukom pyndonkam ia ki surok na ka bynta ki khynnah bad ka la kyntu ia ka tnad Pule Puthi ban pynrung ia kine ha ka National Curriculum Framework (NCF) for School Education, 2023. Ka tnad ka la pyntreikam ruh ia ka skhim ban sdang ia ki Regional Driving Center (RDTC), ki Driving Training Center ha ki jylla bad ki distrik.
Katkum ki jingantad, kiba bun na ki jingduh mynsiem briew ki dei kiba lah ban lait lada ki lanot ki poi mardor sha ki jaka ai jingsumar. Ka tnad ha ka jingiatreilang bad ka National Health Authority bad ka tnad Financial Services ka la mynjur ia ka “Scheme for cashless treatment to victims of road accidents caused by motor vehicles” ban ai jingsumar khlem da khein pisa haduh T. 1.5 lak haduh hynniew sngi ia ki lanot kiba iakynduh ia ki jingiatyngkhuh kali. Shen yn sdang ia kane ka skhim ha kylleng ka India. Kane ka skhim ka pynlong ba ki hospital ki hap ban ai jingsumar ha ka por kaba biang ia ki lanot kiba iakynduh ia ki jingtyngkhuh kali.
Ki jingwad bniah ki pyni ba ki sienjam ba la shim ki dei kiba bha, kiba wanrah jingkylla bad kiba ai mynsiem. Hynrei ka kam ka dang bun ban pynurlong ia ka thong ban don 50% ka jingduna ha ka jingduh ki mynsiem briew. Ka tnad ka ieng skhem bad ka trei borbah ha ka jingiatreilang bad ki Sorkar Jylla. Baroh ki tnad Sorkar kiba iadei bad kane ka kam, ki NGO bad ki nongpyndonkam ia ki surok ki pyrshang lang ban iada na ki jingiatyngkhuh kali bad pynthikna ia ka lawei kaba kham shngain.
Sha ka jingshngain kaba kham bha ha ka leit ka wan
