Shillong: Ka skhim 100 sngi ne ka Mahatma Gandhi National Rural Employment Guarantee Scheme (MGNREGS) ne kaba ju khot paidbah sha nongkyndong kum ka skhim 100 sngi, ka la dei kawei kaba kongsan tam ban wanrah ia ki jinngkylla ha ki jaka nongkyndong.
Hakhmat kane ka skhim ka sorkar India, kaba la pyntreikam ha u snem 2005, baroh ki jait skhim kiban wanrah kam pynroi sha ki jaka nongkyndong, kila jah kyrteng lut bad kim lah ban iakop.
Ki jaka nongkyndong kila phyrnai khrek naduh ki lynti ki syngkieng, ki jaka pyllang um, ki jaka pynneh mariang, bad kumjuh ha ki jaka jngohkai pyrthei. Ki nongkyndong ki bym ioh surok ruh ki ioh surok ha kane ka skhim.
Ha ka jinghiar ki nongthoh khubor sha thain South West Khasi Hills, la ioh ban iakren bad ki katto katne ki nongialam shnong, kiba la pynpaw ba ka skhim 100 ka dei kaba kongsan tam ban wanrah ia ki kam pynroi. Uwei na ki nongialam shnong ka Jakrem, u bah Brilan Wahlang ula iathuh ba ha ka dong kaba u sah mynshwa, ym ju long iaid bha ha ka surok kaba shna ka PWD hynrei hadien ba la wan ka skhim 100 sngi, la lah ban pynbha bad mynta ka iaid ka ieng ka la suk.
Ula ong ba katkum ka jingiatreikam ha ka shnong, kiwei ki skhim sorkar ne ki MLA ne MDC skhim ki shu long tang thohmut thohmat.
Ka phod ha pung bad ka jaka sait jain ha Mawpon, Mawkyrwat kaba la ai jingmyntoi shibun eh ia ki nongshong shnong.
Kumjuh u rangbah shnong ka Phlangkynshi, u bah Polos Marngar ula pyntip ba kane ka skhim ka dei kaba kongsan bha namar ba nalor ki lynti syngkieng, ka shnong ka la lah ruh ban shna ia ka jaka jngohkai pyrthei.
Jah kyrteng lut kiwei ki skhim hakhmat ka 100 sngi ha nongkyndong
