Shillong: U nongialam ka NPP u Rakkam A Sangma u la kam ba ha ka elekshon, baroh ki iatei iakynnoh kawei ia kawei pat hynrei kaba kut ka shong ha u paidbah ban bishar iano ban jied.
Haba kren mynta ka sngi halor ka elekshon shiteng samoi ha Gambegre, u Rakkam u la pynphai nia ia ka jingkynnoh ba ka NPP ka sam skhim tang ia kiba kyrshan da kaba ong ba u MP ka Tura u Saleng A Sangma ula kren paidbah ha ka jingialap elekshon ba un ai work order na ka MP skhim ia baroh ki nongthep vote ka Gambegre.
U la ong ba ka jingiakynnoh bad tei pop, ka dei ka bynta jong ka elekshon bad ki paidbah ki dei ban bishar.
U la ong ba ki politishian kim ju kwah ban shong ha ka liangpyrshah namar ba kan long ka jingduh nong ia ki paidbah ka konstitwensi bad lada u MLA jongki, u long myntri sorkar, u long Speaker, u long chairman ha ka sorkar, ki sngew kmen namar ba ki tip kin ioh jingmyntoi ha ki kam pynroi ha ka konstitwensi.
Ka elekshon sha ka elekshon shiteng samoi ha Gambegre, kan long ha ka 13 tarik Naiwieng 2024, ha kaba kiba iakhun ki kynthup na ka Congress, BJP, TMC bad ki kyrtong shimet.
U Rakkam u la ong ba ka Mehtab Chandee Sangma kaba dei ka kyrtong ka NPP, kan jop kput ha ka elekshon kumba la sakhi ia ka jingkyrshan radbah ki paidbah kiba dang kiew man ka sngi ban wan ai jingkyrshan ia ka NPP.
Ula kam ruh ba ha ka elekshon MLA ha 2023, ki paidbah ka Gambegre ki jied ia u Saleng A Sangma namar ba kim pat tip mano ban thaw sorkar hynrei mynta kila tip ba u don ha ka liangpyrshah bad ki paidbah ki kwah ia ka party kaba don ha ka liangsynshar bad kata ka dei ka NPP kaba ialam ia ka sorkar.