Shillong: Mynta ka sngi u MLA ka Mawlai u Bah Brightstarwell Marbaniang lem bad u MP ka Shillong u Dr Ricky Andrew J Syngkon ki la hiar ban jurip ia ka Surok na Lummawsing shaduh Mawsiatkhnam kaba dang iaid ka jingtrei mynta.
Kane ka surok ka hap ha ka PMGSY scheme ka Sorkar Pdeng bad kaba kot sha ka 6.85 Klur tyngka. La iadon lang ruh u Chief Engineer ba dei peit ia ka PMGSY lem bad ki Rangbah Shnong.
Haduh mynta ka jingshna ia kane ka surok ka la iaid sha ka 75% eiei hynrei ki don ki jak aba rukom trei kam long kaba I hun.
U MLA ka Mawlai ula kyntu ia ki Engineer ban peit bniah bad ban trei katkum ba dei ban trei. U bah Brighstar ula bynrap ba naduh ba khang ia ka jingkieng Damsite, ki kali baroh ki la pyndonkam ia katei ka surok ban poi sha Shillong.
U la ong ba ka jingiaid ki kali heh bad kiba kit palat pud ka la pyllong ia katei ka surok ban jot bad u la ong ba yn iakren ia ka sorkar ban ym shah iaid ia ki kali ba kit palat pud ynda la shna ia katei ka surok.
Ha ka jingshisha, ia kane ka surok la dei ban pyndep hapoh shi snem tangba na ka daw ka jingjur palat u slap ym shym lah ban pyndep ia ka bad hap ban pynjlan shi bnai ne ar bnai.
Na ka liang u MP u la ong ba kane ka Scheme ka dei jong ka Sorkar Pdeng bad ula kyntu ia ki Engineer bad ki Contractor ban trei bha katkum ba dei, ym ban trei tang dep ia ka kam.
Hiar u MLA Mawlai bad u MP, ban jurip ia ka jingshna ia ka surok Lummawsing-Mawsiatkhnam
