Shillong: Ka Khasi Hills Autonomous District Council (KHADC) ka la lah ban pynrung ia ki kyndon ain kiba iasyriemn kum ka Inner Line Permit, ka ban treikam ha ki shnong lyngba ki dorbar shnong, bad ia kane ka aiñ kaba la tip da ka KHAD (Administration of Elaka) Second Amendment Bill, 2023, ia kaba la dep ban ai muhor da u Lat ka Jylla, u C.H. Vijayashankar.
Haba pyntip ia kane, u Chief Executive Member ka KHADC, u Bah Pynïaid Sing Syiem u la ong ba ha kane ka aiñ la lah ban pynrung ia ki seng samla bad seng kynthei/longkmie ban ithuh lang hapoh ka jingtreikam ki dorbar shnong.
Kawei kaba kham kongsan ha kane ka aiñ ka long ba ka don ia ki kyndon kiba iasyriem bad ka Inner Line Permit (ILP) kiba lah ban pyntreikam da ki shnong.
U CEM u la ong, lyngba kane ka aiñ yn lah ban tehlakam ruh ia ka jingioh shong shnong ki briew kiba na bar, da kaba lum ia ki jingtip ba pura lyngba ki kot ki sla na ki jaka ba ki wan.
U Deputy CEM ba khmih ia ka tnat Elaka u la ong ba katkum kane ka aiñ ka shnong kan hap ban pynrung kyrteng bad lum thup (register/record) ia ki jingtip baroh jong ki briew kiba don hapoh shnong, kynthup ruh ia kiba shong dukan, bad u rangbah shnong un nym lah ban ai syrnot ia ki briew ki bym don kyrteng.
Haba kylli ba kane ka aiñ ka lah ban iatyngkhuh bad ki aiñ katkum ka riti synshar ka ri, u Bah PN Syiem u la ong ba kane ka aiñ kam khang ia kata, hynrei ka dei ban don lyngba ki jingthoh bad ki kot ki slab a la buh thup, bad bynrap ba da kaba leh kumne yn tip ruh ia ki briew kiba ju leh ia ki kam beain.
Ka aiñ ba ïasyriem kum ka ILP ha ki shnong ïoh muhor ka KHADC na u Lat
