Babu Kular Khongjirem.
Ha kane ka juk mynta,ka jingiadei bad jingiajan ki khun bad ki kmie ki kpa ka la nang jngai nang jngai. Ym tang katta,hynrei ki jingiadei ka la nang sting bad nang hiar arsut hapdeng ki khun bad ki kmie ki kpa.Ki khun kim don por shuh ban ia kren ia syllok bad ki kmie ki kpa.Kumjuh ruh,ki kmie ki kpa ruh kim i don por shuh ban kren,ban sneng ban kraw ia la ki khun lajong.Hateng hateng pat,i kumba ki khun ki synshar bad pyniaid ia ki kmie ki kpa namar ba ki kham sngew stad bad sngew shai ban ia ki kmie ki kpa jong ki.Kane kalong kaba bakla shibun bad ka lah ban ialam bakla pynban sha ka jingma bad ka jingshyrkhei hadien ha bud. Ki khun kidei ban kohnguh bad burom ia la ki kmie ki kpa.Ki dei ma ki, ki nongbsa-nong btiah, ki nongri nong sumar naduh dangrit bad ki nongpynheh -pynsan bad pynnang pynstad ia la ki khun. Ki kmie ki kpa, namarkata,ki long kum ki blei hakhmat ki khun.Kaba pynsngewsih ia la ki kmie ki kpa kalong kumba pynsngewsih ia ki blei. Ym ju bit satia ban saitlah ne ban leh tam sneng ia la ki kmie ki kpa.Kynja kiba saitlah bad haram ia la ki kmie ki kpa,ka lawei jong kita ki khun kan long lypa kaba dum bad ba kordit shibun.Ka phawer ka maham” Kordit ia ki khun kiba haram ia la ki kmie ki kpa” Lada ki kmie ki kpa ki ai mon palat ia la ki khun ruh,kita ki khun kim ju long briew hadien ha bud. Ka phawer ka la maham lypa ” Ki khun ioh mon kim ju long ei ei”.Lada ki leh suk palat ruh,ka phawer ka la maham lypa,” Don ka ma haba la than eh ka suk” Lada ki tam sneng pat,ka ktien syllok pharshi ka maham ba “Ki khun tam sneng kidei ki nongshun ba sniew tam jong u briew.”. Dei ban nang ban kohnguh khnang ba phin nang ban synshar hadien ha bud”
Don bun ki khun kiba la shu kjit sah na ka kamai ka kajih ki kmie ki kpa wat hadien ba ki la san la rangbah. Kum kine ki jait khun ki ju khot kum ki “Ki khun jynrein” kiba mih na ka doh,dait ruh ia ka juh ka doh.Ki khun jaipdeh pat kiba shu pan pisa sah na ki kmie ki pa haduh ba kin da kyrduh hi khait,ki ju ong “Ki khun tham” mih na ka kmie,bam duh syndon ia la ka kmie haduh ba kan da iap.Don ruh ki “Ki Khun kbeit-shapuloit”,ki khun kiba byrngem shoh bad byrngem dat ia la ki kmie ki kpa haduh ba ki kmie ki kpa ki tieng kylla thot thot ia la ki khun shwa ba kin rung ha ing.Bun ruh ki khun kiba leh bym salia bad bym niewkor bad ibein ia la ki kmie ki kpa.Kane ka rukom leh ki khun kumta ia la ki kmie ki kpa ka la long lypa ka dak ka shin jong ka jinghiar dor ka akor ka burom jong ka long briew man briew na ing na sem. Lada ka akor ka burom ka la hiar lypa na ing,yn nai iakren shuh shabar ha shnong ha thaw ne ha ka imlang ka sahlang namar ka ktien ki ‘riew stad ka ong ba “Kiei kiei baroh ki sdang na ing”(charity begins at home).Kumno ban saindur na ing na sem,kumno ban saindur ha ka kur ka jait bad ha shnong ha thaw namar ka sorkar kan nym lah ban leh ei ei khlem ka jingiatreilang ka iing ka sem,ka kur ka jait haduh ki shnong ki thaw. Wat ki Balang ne seng niam ruh ki don ka bynta kaba khraw ban saindur ia ka imlang sahlang kaba la sdang lyngkar bad sniewdur haduh katne ha kine ki por mynta.
Ka kamram ki khun ia la ki Kmie ki Kpa
