Shillong: Ka Meghalaya ka la don mynta hapdeng ka thongbah thongsan, bad ka donkam ba kan pynskhem bad ban tied bha lada ka thrang ba kan tan kylla ia ka jingiakhun ha ka Ranji Trophy 2024-25 Elite Group A pyrshah ia ka Tripura kaba la long ha madan ialehkai cricket ka MCA ha Polo.
Tad haduh ban da kut jong ka sngi kaba lai, ka Megjalaya ka la shem ialade ba kan hap ha ka follow-on.
Haba phai sha kane ka jingiakhun, ka Tripura ka la wan ba kan mih madan biang sa shisien hadien ba ka la lah ba kan kamai lypa 346/4 bad ka la iai bteng shipor ba kan bet ha shwa ba kan shim ia ka rai ban khylliap noh ia la ka pali ka jong ka (declare) hadien ba ka la lah ba kan kamai 377/8.
Hadien kane, ka Meghalaya kaba la wan ba kan bet ia la ka pali ba nyngkong ka jong ka, ka la lah ba kan kamai 222 ron bad ka pynlong ia ka Tripura ba kan lah ba kan tam lypa da 155 ron naka bynta ka pali ba nyngkong.
Haba la wan ban bet naka bynta ka pali kaba ar (second innings), haduh ba kut jong ka sngi, ka Meghalaya ka la lah ba kan kamai 3 ron khlem bad hap wat iwei ruh I wiket bad ba ka dang donkam ban kamai sa 152 ron ban lah ban pynlong ia ka Tripura ban wan ban bet ia ka pali kaba ar ka jong ka, kaba hangne lada ki nongtied (batsman) ka Meghalaya ki lah ban leh ia kane, ki lah ruh ban tan kylla ia kane ka jingiakhun sha ka dro (draw).
Ki passoh na kane ka jingiakhun jong ka sngi ka long u Ajay Duhan (guest professional) u la long u shot shan ia ka kynhun, hadien ba ula wan ban tied ha ka kyrdan kaba lai bad u la iai bteng ban iai neh haduh jan ba kut jong ka pali ha kaba u la lah ban kamai 93 ron na ki 198 tylli ki bol (13x4s, 1×6).
Hynrei shwa ia kane, ka bok ka nusip ka la don bha bad u Ajay namar ba u la shu lait salit ban out hadien ba ka bol kaba la dei naka bet ka jong u ka la her sha ki bynta ka gully bad khlem don bai oh ban kem ia ka da ki fielder ka Tripura.
Dei ha kane ka kynti iakhun, ba ki kato katne na ki rang ialehkai ba dei na kane ka jylla ki la pynpaw ia ka jinglong kaba la ih bad rangbah ka rukom ialehkai ka jong ki, kine ki kynthup ia u Bamanbha Shangpliang uba la lah ban kamai 23 ron katba u Kishan Lyngdoh u la ialeh katba lah ban kamai kham sted hadien ba u la lah ban kamai 21 ron ba la wan na ki 15 tylli ki bol, ha shwa ba uyn ngat ha ka shrip jong u MB Mura Singh ka Tripura, uba kylla long u bowler ban ioh khur 6 wiket naka bynta 52 ron na ki 26.4 over.
Kham shadien jong ka jingiakhun u Akash Kumar Choudhary u la ialeh katba lah ban kyrshan ia u Ajay na sha shilliang naka bynta ka wiket ba 7 hashwa ba un out noh hadien ba u la lah ban kamai 23 ron.
Lehse lada kane ka jingiakhun kan dang iai bteng kat kum ka por kaba la buh, yn nym lah pat ban tip kaei pat kaban dang jia ia ki nongtied (batsman) ka Meghalaya ha ka pali kaba ar ka jong ka, ia kaba u lyoh uba rben bad ka jingkah dum ka suiñ bneng lah pat ban ong ka la iada pat ia ka na ki jingeh, hynrei ka thongbah kaba sah hi kan long lashai pat ka sngi.
Ka Meghalaya ka la don ha ka thong ka Ranji Trophy 2024-25 Elite Group A pyrshah ia ka Tripura
