Wahkhen: Mynshwa kumba 20 snem eiei, haba don ka shad ka kmen tynrai, kam long kaba suk ban shu ioh ia ki duhalia hynrei hap ban leit wad leit iakren pynbeit, hynrei mynta kane kam long shuh kumta.
Ka jingsngew sarong na bynta ka Sieng Riti Institute, Wahkhen, kaba la mih 22 snem mynshwa hapoh ka jingialam u rangbah Komik Khongjirem, bah Rojet Buhphang (bam kwai ha duwar u Blei) lem bad kiwei, ban prat lynti halor kane ka bynta kaba kongsan eh jong ka jaitbynriew. Lah ban ong ba kane ka shlem ka long kat ka skulbah tynrai shisha, ha kaba la hikai tang da ka ktien sneng ktien kraw. Ka jinghikai ka long naduh ki jingtem jingput tynrai kiba bun jait haduh ka rwai iawbei, phawar ka kynhoi, ka shad ka mastieh, nalor ka khana ka pyrthew bad kiwei.
Ka Sieng Riti ka don ha shnong Wahkhen ka them war hapoh ka Hima Khyrim ka East Khasi Hills bad ka jngai 15 km na surokbah Shillong-Dawki, bad 55 km eiei na sor Shillong. Kane ka shnong ka la ioh ruh ia ka jingithuh na ka sorkar Meghalaya kum ka shnong ka lariti ne ka Indigenous village namar ka jingriew spah ka riti dustur, ka rwai ka siaw, ka riam ka beit bad ka put ka tem tynrai. Dang shen, kala ioh ruh ia ka khusnam na ka Indian Responsible Tourism State Award 2024, Meghalaya na ka Outlook Responsible Tourism.
Ha kine ki 22 snem, ka Sieng Riti kaba ieng ha I trep, ban sain dur ia ka lawei, ka la nang tyllun hapoh ka jingialam u Rangbah Komik uba la ioh ia ka National Award ha ka Tangmuri na Sangeet Natak Akademi, New Delhi, bad ka la lah ban sei ia u soh thiang ban pynim ban pynkhlain ia ka put ka tem tynrai bad ka lariti, ban ioh ia ka jingithuh na ki bor sorkar bad kiwei ki kynhun ia ki kam bad ki matti jongka. U Rangbah Komik u la ju hikai ruh mynshwa ha NEHU, Jeebon Roy skul, Synod Music, St. Anthony College, ha Ars and Culture bad ha kiwei ki skul ha ka put ka tem tynrai.
Kaba sngew phylla ka long ba ki nonghikai ha Sieng Riti watla kim ioh kano kano ka jingsiew hynrei ki aiti mon sngewbha ia ka bor bad ka buit ban pashat khlem khohnioh. Mynta jin kumba 80 ngut eiei ki khynnah naduh kiba dang rit haduh kiba la kham heh, ki la nang ban tem ban shad, ban riam bad ban rwai lyngba ka jingsain dur ha ka Sieng Riti.
Ka jinghikai ia ka akor ka burom, ka ktien ka thylliej, ka kren ka khana bad ki khana sotti juk, la sain dur ia ki khynnah kane ka shlem, ba kin tip ban iaid ha ka lynti kaba dei ha ka lawei ka jongki. Man ka sngi Robibar, ka shlem ka Sieng Riti ka sawa bad shlei da ki sur ba jam ban par sha kylleng sawdong jong ki lum ki them sawdong ka shnong na ki kti kiba tbit bad ka sur ba syiang jong ki khynnah kynthei bad shynrang kiba la wan shah hikai.
Hynrei kaba phylla ka long ba ki kti jong ka sorkar, ki jngai ban knier lem ban iarap na bynta ki jingdonkam kum ka ïing bad kiwei ki jingdonkam.
Ka Sieng Riti Institute, Wahkhen ka skulbah ka put ka tem tynrai
