Shillong: U myntri ka tnad jngohkai ka jylla u bah Paul Lyngdoh ula ong ba shisien ba ka sorkar ka la lah ban pynsting ia ka jingkitkhia ki surok ha kaba ki nongwankai ki lah ban hiar beit sak na suin ha kad liengsuin ha Umroi.
Haba kren mynta ka sngi, u bah Paul ula ong ba ka jingpynheh ia ka kad liengsuin ka dei ka mat kaba kongsan bha ban kyntiew ia ka kam jngohkai bad kan ai kam ai jam ruh kumba 3 hajar ngut ki samla ha ka tnad ka kit ka bah ne Transport.
Ula ong ba ka sorkar kan thung ruh ia ki tourist body ha kaba yn sdang shwa 50 ngut ki samla ban ialam, ban batai ia ki nongwankai ia ka jinglong jingman ka jylla Meghalaya. Ia mynta yn buh shwa ia kine ki tourisy body ha Sohra, Umiam bad ha Shillong.
Ha kaba iadei bad ka mat kaba la wanrah ki nongniah kali kamai na ka jylla, u bah Paul Lyngdoh ula ong ba kila briew kila kren shai ba ym lah ban khang ia ki kali nabar ban wan sha ka jylla. U la ong ba dei ruh ban peit ialade ia ka jingshakri ba ki nongniah kali na kane ka jylla ki ai sha ki nongleit nongwan ha kaba iadei ka ktien ka thylliej, ka akor ka burom, ka riam ka beit, ka jingbiang por bad ha kane ka pyrthei jongka jingiakop, ym lah ban iapein ia kine bad ki dei ki bynta ba kongsan.
Hynrei ha kajuh ka por, u la ong ba ka donkam ban don ka surok kaba bha ban khring ia ki nongwankai sha kane ka jylla bad dang shen, ka sorkar ka la mang 2 klur tyngka ban maramot ia ka surok sha lum Mawthadraishan kaba dei ka jaka jngohkai kaba pawnam bha ha ka jylla.
Ym lah khang ia ki kali nabar, hadien ba la lah dem ki liengsuin heh, yn kham sting ka jingkhia ki surok:Paul
