Shillong: U myntri ka tnad jngohkai ka jylla uba dei ruh u nongaiktien ka sorkar, u bah Paul Lyngdoh um shym la sngew dei ia ka jingleh ka seng Hynniewtrep Youth Council (HYC) ban shu bat ia ki nongdih bad nongkhaii drok.
Haba jubab mynta ka sngi, halor ka jingbat ka HYC ia ki nongkhaii drok bad ki nongdih, u bah Paul ula ong ba u President ka HYC u dei uba pule ia ka ain bad u tip bha kaei ka NDPS bad hato ka ain ka shah ban bat ia ki briew bad ka bha ban kylli na u. Hato ka ain jong ka ri ka shah ban bat ia ki briew.
Dang shen, ki nongialam ka HYC kila shah pynngat mukotduma ha ki pulit halor ka jingkynnoh ba ki leh tohmet ia ki nongkhaii bad nongdih drok ha ki pulit ka Rynjah Police Station.
U bah Paul u la ong ba ka jingleh kaba khlem katkum ka ain, ka long tang ban shu pyni shipor hynrei kan ym lah ban ieng slem. U la ong ba haba leh ia kano kano pyrshah ia ka ain, ka long beain bad kam lah ban ieng ha khmat ka kashari bad ka dei ka jingshah rem pynban.
U President ka HYC u dei u nongiasaid ain, u tip bha ia ka NDPS, hato ka ain ka shah ban bat nongkhaii-nongdih drok: Paul
