Shillong: U Vice President ka ri u Jagdeep Dhankhar ula buh maw nongrim na bynta ka Meghalaya Skill and Innovation Hub ha ka jingdon lang u Lat C.H Vijayashankar, u myntri rangbah u Conrad K Sangma bad ka myntri ka kong Ampareen Lyngdoh.
U Vice President ula pyllait ruh ia ka CM Business Catalyst: Student B-Plan Challenge with IIM Shillong bad ia ka jingiasoi soskular hapdeng ka UNDP bad ka sorkar Meghalaya.
Ia ka Meghalaya Skill and Innovation Hub yn tei ha ka jingheh kaba 6.54 acre ha New Shillong ha ka jinglut kaba T. 77.5 klur.
Haba kren ha kane ka prokram, u Vice President ula iaroh ia ka sorkar jylla kaba la shim ia ki sienjam ban kyntiew ia ki samla ka jylla.
U la ong ba ka ophis kaba heh tam ha ka ri, kata ka President ka ri India, la bat da ka longkmie kaba dei ka riewlum bad ka DGP kynthei ba nyngkong ka Meghalaya ruh ka dei ka kynthei kaba dei ka riewlum bad kane ka pynphlang ia ka jingkylla ka ri India ha ka roi ka par.
Ula pyntip ba 60,000 klur la mang na bynta ban ai jinghikai pyntbit ia 5 lak ngut ki samla ha kane ka san snem ban wan ha ka ri.
Katba u myntri rangbah u Conrad K Sangma u la ong ba kumba 85 percent ki nongshong shnong ki dei hapoh ka rta 45 snem bad ki samla ki dei ka jingkhlain bad ka spah bad na kane ka daw, ka sorkar ka la shim ia ka sienjam ban btin lynti ia ki.
Plie maw Nongrim u VP ban tei ia ka shlem Meghalaya Skill and Innovation Hub
