Shillong: Ka Meghalaya Arm Wrestling Association Ia Ka Jingjied ia ki nongialehkai jong ka jylla Meghalaya ban mihkhmat Ia Ka Team India Sha Ka Asian International Cup.
Ka Meghalaya Arm Wrestling Association (MAWA) ka dap da ka jingkmen ban pynbna ba 19 ngut ki nongialehkai ba pawkhmat jong ka jylla Meghalaya, ba kynthup ia ki 9 ngut ki nongialehkai na ka kyrdan para kin ia mihkhmat ia ka Team India sha ka Asian International Cup ba pawnam. Kane ka jingïalang kaba sngewtynnad kan long ha Mumbai, Maharashtra, naduh ka 19 haduh ka 26 tarik u Lber, 2024.
Ka jing shah jied ia kine ki nongialehkai ka long ka jingpynshisha ia ka jingtrei shitom, ka jingaiti lut, bad ka jinglah ban shah. Ki la pyni ia ka jingtbit bad ka jinglehkai kaba phylla, kaba la ioh ia ka jaka ha ka kynhun ialehkai jong ka ri. Napdeng ki nongialehkai ba la shah jied ki dei ki nongialehkai ba la tbit bha bad ki khlur ba dang kiew, kiba pyni ia ka jingjylliew jong ka sap hapoh ka imlang sahlang jong ka arm wrestling ha Meghalaya.
Nalor ki nongïalehkai, ka MAWA ka la thung ïa u Bah Aiboklang Paul Wanniang kum u kapten jong ka kynhun, ha kaba la kyrshan da ka kong Margaret Pathaw kum ka co-captain. Ka jingïalam jong ki kan long ka atiar ban ïalam ïa ka kynhun ha baroh kawei ka jingïalehkai. Ngi sngewkmen ruh ban pynbna ba la jied ïa u Bah Terence Jones Lyngskor bad ka Kong Sumita Kshiar kum ki nongmihkhmat ba thikna na ka bynta ka kynhun. Ka jingshemphang bad jingtbit jong ki kan don ka bynta kaba kongsan ban pynthikna ba ki nongialehkai kin long kiba la pynkhreh bha na ka bynta ki jingeh kiban sa wan.
Ka kynhun ka dei ban leit sha Mumbai ha ka 18 tarik u Lber, 2024. Ngi pynshlur ïa ki paidbah bad ki nongieid ïalehkai ban kyrshan ïa ki nongïalehkai jong ngi ha ka jingduwai jong ki katba ki dang sdang ïa kane ka jingïaid lynti kaba kongsan khnang ba kin lah ban ïalehkai bha bad wan phai sha ïing da ka jingjop. Ka jingïalehkai Asian International Cup ka ai ka lad kaba phylla ïa ki ban pyni ïa ka sap jong ki ha ka madan ïalehkai jong ka pyrthei, ban ïakhun bad kiba tbit tam, bad ban kyntiew shuh shuh ïa ka kyrdan jong ka jingïalehkai kti ha India.
Ka MAWA, ka pynpaw ïa ka jingsngewnguh kaba khraw ïa u Myntri Rangbah ba donburom jong ngi Shri Conrad K Sangma uba aiti lut, ïa u Myntri ïalehkai Shri Shakliar Warjri uba aiti lut, ka Directorate of Sports and Youth Affairs, bad ka Meghalaya State Olympic Association ha ka jingialam jong I Bah John F Kharshiing, na ka bynta ka jingkyrshan bad jingaiti ba khlem pud kiba la long ki atiar ha ka jingkiew bad jingjop jong ngi. Ngi sngewnguh shisha ia ka jingiatreilang bad jingai mynsiem jong phi, kaba ai mynsiem ia ngi ban poi sha ki kyrdan kiba thymmai ha kaba kyntiew ia ka jingialehkai bad ka jingpynroi ia ki samla ha ka imlang sahlang jong ngi. Khublei shibun ba phi ngeit ha ka jingthmu jong ngi bad na ka bynta ka jingkyrshan ba bteng jongki.
Kane ka long ka jkrwoh na u Hubert Lyngdoh Nonglait, Information secretary MAWA.
Pynbna sngew sarong ka MAWA ia ki nongiakhun kti ban leit sha Asian Intl. Cup
