Shillong: Ki paidbah jong ka shnong Nongspung, East Khasi Hills District ki la pynpaw ka jingpyrshah ïa ka jingleh u Acting Syiem ka Hima Nongspung uba la weng kam jubor ïa u Acting Sordar khlem kino kino ki daw.
Ha ka 4 tarik Risaw 2024, ki paidbah ki la leit ban ujor ha u EM ka tnad Elaka u Bah Pynsngaiñ N Syiem halor ka jingkynnoh weng kam jubor u Bah Kyntiewborlang Syiemlieh ïa u Acting Sordar ka Shnong Nongspung u Bah Lodral Nongsiej.
U Bah Haiarles Marweiñ uwei na ki nongshong shnong, ha ka 15 tarik Risaw haba kren sha ki lad pathai khubor ha Shillong Press Club u la ong ba utei u Acting Syiem u la leh donbor marwei khlem kano kano ka jingïakren hapoh ka EC.
U la ong ruh ba hapoh ka jingïalam u Bah Lodral kum u Acting Sordar ka shnong ka thaw ka shongsuk shongsaiñ, hynrei khlem kino kino ki daw la shah wengkam jubor da utei u Acting Syiem.
Shuh shuh la ïathuh ruh ba dei hapoh ka jingialam u Bah Lodral Nongsiej kum u Acting Sordar ba la lah ban plie ïa ka College ha Nongspung kaba long ka jingmyntoi ïa ki samla pule. Kumta na ka liang ki paidbah ki dawa ïa ka EC jong ka KHADC ha hapoh 15 sngi ba kan thung noh da u Sordar uba pura jong ka shnong.
Bad lada jia ba ka KHADC kam sngap ïa ki jingdawa ha kitei ki 15 sngi, na ka liang ki paidbah kin sa wan ban tur syndon shapoh KHADC.