Shillong: Mynta ka sngi, u myntri ka tnad Social Welfare ka jylla u bah Paul Lyngdoh ula leit iuhkat ia ka ophis kane ka tnad ban sakhi ia ka jingtreikam ka child bad Women Helpline.
Ha kane ka jingwan jurip, u myntri ula shem ba ka jingkiew ka jingujor halor ka jingshah thombor ki longkmie bad ki khynnah kynthei ha ka jylla namar ba ki la kham shai bad kham shlur ban mih shakhmat haba don kano kano ka jingshah leh bein na ka jingshim khia ka tnad ban ai ia ka jingpynshai kaba man ka por.
Katkum ka jingong u myntri, ka pyni ba ka jingtreikam ka long kaba jop ha kaba ka tnad kan nang pynkhlain shuh shuh ban iada ban iarap ia ki kynthei khynnah bad ki longkmie.
U bah Paul u la ong ba ka donkam ban pynkhlain ia kane ka tnad ban peitngor ia ka jingshah thombor ki kynthei da kaba pyniatylli lang ia ka rukom treikam naduh Secretariat khnang ban pynsted ia ka jingtreikam.
Ha 2024, ki don 60 tylli ki jingjia shah thombor ki kynthei hapoh ïing hapoh sem katkum ka kaiphod ka Women and Child Care Control Room.
U myntri u la ong ba ka jylla Meghalaya ka dei kaba shngain tam ia ki kynthei ki khynnah ban ianujor bad kiwei ki jylla haka ri bad ia kane la ban sakhi haba ki kynthei nabar jylla ki ju wan ban jngoh ia kane ka jylla.
Ka Director ka Social Welfare ka kong Camelia Doreen Lyngwa, M.C.S ka la iathuh ba ka don 700 ngut ki nongtrei ha ka Child bad Women Helpline Branch.
Ka la ong ba ki kynthei kiba iakynduh ia kano kano ka jingeh, ka jingjia ki lah ban phun ha u number 1098 ia ki khynnah bad 181 ia ki kynthei ba la heh ha kaba kin ioh ia ka jingbatai, ka jingbthah bad ka jinghikai kumno ban pynbeit ia ki jingeh jongki. Ka la ong ba ha man ki district la khlieh da ki Deputy Commissioner.
La kham sngewthuh ki kynthei ban wan ujor haba shah thombor
