Shillong: Ka bynta jong ka surokbah National Highway 6 ha East bad West Jaintia Hills, lah ban ong ba ka dei kaba jot tam.
Kane ka surok kaba pyniasoh ia ka jylla Meghalaya bad ka jylla Assam bad kiwei ki jylla, ka dei kaba bunkam tam namar da ki hajar tylli ki kali ki mareh khlem sangeh man ka sngi ban leit kit bad pynhap ia ki jingkit jongki. Ka jingriew spah katei ka thain ha ka jingdon ki marpoh khyndew bad ka jingbun ki karkhana khamtam kiba saiñ dewbilat, kala pynthnem ia ka kit ka bah bad ka khaïi pateng. Kane kala ialam sha ka jingmih shibun ki ïing basa ne hotel ha ka thaiñ ban pynbiang ia ka bam ka sah ia kiba leit ba wan.
Hynrei kaba sngew tohmet ka long ba ka surok ka long kaba sniew haduh katta katta. Na ka jingsniew ka surok, kala pyllong ia ki kali ban kynduh mawsiang, bad bunsien ki don kiba kylla, kiba khyllem lyndang ryngkat ka jingkit bad ka la pynslem ruh ia ka leit ka wan ha kane ka juk iabeh kam.
Na thaiñ Khliehriat, Lumshnong ter ter shaduh Umkiang, Ratacherra ka jingjot kane ka surokbah ka la long palat liam bad ka jingñiah kali kam long shuh kaba sngew tynnad. Ki kali rit lei, tang shu bakla iaid, la riew tlum tlam sha khrum.
Katei ka thain ka kynthup ia ka Khliehriat bad Saipung Sutnga konstitwensi bad ka jingap khmih lynti lano ka surok kaba bha kan urlong, ka jubab ia kane, ka dei na ki briew kiba don ha ka sorkar.
Ka bynta ka surok bah NH 6 ha East bad West Jaintia Hills, lah ban ong ba ka dei kaba jot tam
