Shillong: Ka Seng Hynniewtrep Integrated Territorial Organization(HITO) Narpuh Circle, ha ka 9 tarik Risaw, 2024 ka la lah phah jingthoh sha ka Meghalaya State Pollution Control Board(MSPCB) lyngba u Deputy Commissioner (DC) jong ka East Jaintia Hills District, u Shivansh Awasthi, IAS, ban pyrshah jur halor ka jingthmu jong ka Meghatop Cement Pvt Limited ban pynlong ia ka jingsngap paidbah ha ka tarik 18 Risaw 2024 na ka bynta ban tei ia ka karkhana pynmih dewbilat ha shnong Wahiajer Narpuh, East Jaintia Hills District.
U President bad General Secretary ka Seng ki la pynpaw ba ka jingtuid u bar jylla ha East Jaintia ka long kaba lah i shyrkhei bad ka don ka jingma ruh hadien habud, ka ban ktah ia ka kamai kajih jong ki pateng ki ban sa wan, lada u mynder u ioh kdup lut ia ka khaii ka pateng.
Ki kharkhana pynmih dewbilat kiba treikam mynta ki don haduh 8 tylli hapoh East Jaintia District, bad na kine kiba lah don lypa ruh la iohi shai ba ki la dep ban pynjot bad pynjakhlia ia ka mei mariang bad nalorkata ka jingkyrduh kam ka dang kiew na kawei ka por sha kawei pat bad ka seng ka la ong ba kam myntoi ban wanrah shuh shuh ia ki kharkhana pynmih dewbilat haba ia ki jingeh la ioh mad da ki laiphew jait lai phew rukom.
Na ka liang ka seng ka pyrshah jur ia kane ka jingsngap paidbah ne ka Public Hearing jong ka Meghatop Cement Pvt Limited. Ka Seng ka la maham ruh ia ka sorkar ba kam dei shuh ban ai jingbit ia kino kino kiba thmu ban tei karkhana pynmih dewbilat hapoh East Jaintia bad ka sorkar ka dei ban pynsangeh noh ia kane ka Public Hearing.
Kein noh ban ai jingbit ia ki kompeni dewbilat, la dep jot thiaw ka mariang ha East Jaintia Hills: HITO
