Shillong: Ka Sieng Riti Institute, Wahkhen ha ka sngi Robibar ba la dep, ka 6 tarik Risaw 2024, ka la pyllong ia ka jinglehkmen kyrpang halor ka jingioh khusnam takma ksiar kum ka nongkit tien syiem ia ka lariti kaba iadei bad ka kam jngohkai pyrthei, ka Indian Responsible Tourism State Award 2024, Meghalaya na ka Outlook Responsible Tourism.
Ha kane ka sngi, ka la don ka jingiadih sngewbha bad ka jingpyni skit ia ki jingtem, ka phawar na ki khynnah kane ka shlem tynrai. La sakhi lang ha kane ka sngi u Sordar ka Raid Wahkhen, u bah Jansing M Tynsong, ki tymmen shnong, bad ki kmie ki kpa ruh jong ki khynnah kiba shah hikai ha kane ka shlem.
Ia ka jingialang la pyniaid u babu Snar Sing Malngiang ba dei u Secretary ka Institute ha kaba la ioh ia ka jingkren na u President bah Komik Khongjirem, kumjuh na u Sordar bad na u tymmen shnong bah Snapia Tynsong.
Ka Outlook Responsible Tourism ka la jied ia ka Sieng Riti Institute, Wahkhen ban ioh ia kane ka khusnam kaba kyrpang na bynta ka jingnoh synniang sha ka jingpynneh, bad kyntiew ia ka riti dustur, ha ka tem ka put, ka riam ka beit, ka siaw ka rwai tynrai nalor kiwei, kiba iadei bad ka kam jngohkai pyrthei.
Kum ka dak ka jingkmen, la pyllong ruh ia ka jingkynhoi, kyrkoh ha phyllaw kane ka shlem kaba la iashim bynta da baroh kiba don ha katei ka sngi.
Kane ka shnong ka la ioh ruh ia ka jingithuh na ka sorkar Meghalaya kum ka shnong ka lariti ne ka Indigenous village namar ka jingriew spah ka riti dustur, ka rwai ka siaw, ka riam ka beit bad ka put ka tem tynrai
Ia kyrkoh ki khynnah ka Sieng Riti ba ioh khusnam
