Shillong: Ka jingitynnad bad ka jingpawnam ka Mawphanlur ha u lum Mawthadraishan ka Eastern West Khasi Hills, ka la pyndiaw dpik dik dik ia ki nongleit nongwan khamtam ia ki nongjngohkai bad ka daw ka dei namar ba ka surok kaba kiew na iew Markasa arted ka la sniew tasam haduh katta katta.
U nonglum khubor dang shen ha ka jingleit poi sha katei ka jaka, u la sakhi ba ka surok ka la sniew shisha naduh Markasa ban kiew sha kliar ka Mawphanlur. Ha kiba bun ki jaka, ki kali ki hap ban wad jaka iaid na jaka kaba bha ban pynmareh ia ki taiar kali namar ba bakla tiak, la rew pynban jrain, tdum tdam sha khrum kali khamtam kiba tbian khrum.
Kane ka surok ka don kumba 5 km eiei na Markasa ban poi sha kliar lum, ha kaba ki pung kiba jyrngam bad khuid ki khring ia ki nongwankai nalor ka jingitynnad bad shynna sawdong ban iohi sha them khamtam haba shai bha ka mariang. Ka jingsniew ka surok ka la pynkhohnioh ia ki nongwankai ban leit jngohkai namar ba ha ka jaka ban sngew tynnad ban peitkai ia ka mariang kaba ithiang, kila jrem pynban ka met ka phad.
Kawei pat ka surok kaba la sniew kham slem ka dei na Kynshi sha Lawbyrtun sha Mawkyllei, kaba dei ka shnong jong u bah Hoping Stone Lyngdoh, bam kwai ha Duwar u Blei. Ha ka jingiaid lynti u nonglum khubor, la sakhi ba kane surok kaba don kumba 10km eiei, ka la sniew mar ia rung na Kynshi ter ter shaduh Mawkyllei bad don lei ki jaka siang tang ki mawria khlem pyndep siang rong. Kane ka la pynsyrtok ia ka leit ka wan ki kali bad kumjuh ia ki nongleit nongwan.
Kine ki surok ki hap ha Mawthadraishan konstitwensi ka Eastern West Khasi Hills.
Hap iaksaid ki kali ban kiew sha Mawphanlur, syngeit ki kali sha Lawbyrtun ba jot thiaw ka surok
