Shillong: Ka seng Voice Of The People party (VPP) kala byrthen ia u Vice Chancellor ka skulbah North Eastern Hills University (NEHU) u Prof. Prabha Shankar Shukla ba u dei ban mih noh na ka NEHU lada ka jingdon jong u, ka long ka daw ka jingpynduh nong ia ki trai muluk ka jylla.
Mynta ka sngi, ka 3 tarik Risaw 2024, ki nongialam ka seng kynthup u President u Bah Ardent Miller Basaiamoit, u MLA ka Nongkrem Constituency, u Bah Brightstarwell Marbañiang MLA Mawlai Constituency, nalor u MP ka Shillong Parliamentary u Dr Ricky AJ Syngkon kila kynduh ia u Vice Chancellor kane ka skulbah u Prof. Prabha Shankar Shukla.
Ka jingkynduh jongki ïa u Vice Chancellor ka dei namar ba ki don bun ki khynrum kynram hapoh kane ka skulbah khamtam ka jingeh ki samla pule, ka jingshah khñiot beiñ ki trai Muluk, bad ka jingeh ki Nonghikai hapoh kane ka skelm pule bad kiwei kiwei ki mat.
U bah Ardent ula ong ba ka jingiakren ka long beit ba lada ka jingdon u Vice Chancellor ha kane ka University ka long ka jingduh nong ïa ki trai Muluk kane ka jylla, ka bha ia u ban mih noh mardor.
U Bah Ardent u la bynrap da kaba ong ba ka VPP kam shah ban Ïohi ba u Vice Chancellor un long ka jingduh jingmyntoi ia ki trai muluk bad ban ioh jingmyntoi ki bym dei hok ban ioh namar ba u Vice Chancellor u leh khlem burom ïa ki kyndon Jong ka NEHU Act.
Haba Ïadei halor kine ki khynrum kynram ka VPP ka la ai por tang khyndiat sngi ba u Vice Chancellor u dei ban pynbeit ïa ki khynrum kynram bad ka VPP kan ap ïa ka rai jong u.
Ki mat kiba ka VPP kam iahap ka dei ka jingthung ia u professor ba la shongthait ha NEHU Tura, u thong Controller ia u ophisar shipai uba la shongthait, bad la kyntiew ia u kum u Registrar nalor kiba bun kiwei ki jingleh jong u ha la ka mon lajong.
Mih noh lada me don hangne ban long ka jingduh nong ia ki trai muluk: VPP ia u VC ka NEHU
