Shillong: U Chief Executive Member (CEM) ka Jaintia Hills Autonomous District Council (JHADC) u bah Thombor Shiwat ula ther ia ka jingiakhih ka seng Voice of the People Party (VPP) kaba la pyllong ia ka jingiakhih ban dawa ban pyllait noh ia ka tulop ki nongtrei ka Council dang shen.
Haba kren mynta ka 30 tarik Nailur 2024, u bah Thombor u la ong ba ka seng Prah ne ka VPP ka dei ka seng bhalang bad ka jingwan kyrha jongki hakhmat ka Council kam myntoi eiei namar ba lada don pisa ka Council ka siew ia ka tulop bad lada kam don pisa ka Council kam lah leh eiei lada ki wan kyrha man ka sngi ruh.
U la ong ba ki VPP ki wan khnang ban kyrha namar ba ki ioh jingtip ba ka pisa ka la jan poi ban pyllait ia ka tulop ki nongtrei, khnang ba kan ioh burom hakhamt u paidbah ban kam ba dei maki, kiba leh.
U la ong ba kane ka dei tang ka buit jongki namar ba ka la jan ka elekshon bad ki wan leh khnang ban shim kabu. U la ong ba ka tulop kaba sah ban siew ka long 7 bnai bad kumba 6 klur eiei ha ka shi bnai. U CEM ula ong ba ka sorkar kan pyllait pisa kumba T.17 klur eiei.
Katkum ka jingong u CEM, ka jingbym ioh tulop kam dei tang ia ki nongtrei hynrei ia ki MDC baroh kim ioh tulop.