Shillong: U nongialam ka NPP uba dei ruh u myntri sorkar, u Marcuise N Marak ula kam ba ka jingiakhun ha ka elekshon shiteng samoi ha Gambegre konstitwensi kan long hapdeng ka TMC bad ka NPP.
Haba kren mynta ka sngi, u Marcuise ula kam ruh ba ka Congress kan sa jah kyrteng ha katei ka konstitwensi ha kane elekshon kaban sa long shen.
Ka NPP ka dei kaba ialam ia ka sorkar mynta ha ka jylla, katba ka Congress bad ka TMC ki dei kiba shong ha ka liangpyrshah. “Ki paidbah kim sngew tynnad ia u kyrtong ka Congress bad katkum ka jingtip jong nga, ka jingiakhun ka lah ban long bad ka TMC bad NPP, bad ngi kyrmen ban jop watla ka dei ka jingiakhun”, la ong u Marcuise.
Ka Gambegre konstitwensi kala sah thylli hadien ba u Saleng A Sangma uba jop na ka Congress ula risain noh hadien ba ula jop kum u MP ka Tura.
U Marcuise ula ong ba ka jingialap elekshon ka thnem bha ha Gambagre mynta ha kaba ki myntri sorkar kynthup ma u, kila hiar bunsien sha katei ka konstitwensi nalor u myntri rangbah u Conrad K Sangma.
U la ong ba ki paidbah kila stad bha mynta bad kila tip ia ka politik bad ki tip mynta ba ka NPP ka don 31 ngut ki MLA bad kin kham noh sha ka party kaba don ha ka liangsynshar.