Shillong: Ka jingthmu ka kynhun ki Hindu ban pynkam kmie ia ka masi bad ban khang bam doh masi, ka la pynbitar ia ki sengbhalang ha Meghalaya bad kila leit tur sha kad liengsuin ha Umroi ha kane ka sngi Saitjain hadien ba kila ioh jingtip ba u Pujyapad Shankaracharya Ji Maharaj ula thmu ban wan sha Shillong lyngba ka liengsuin shi bynta ha ka jong ka Gaudhwaj Sthapana Bharat Yatra.
Hynrei na ka jingbym shah ka sorkar, u Pujyapad Shankaracharya Ji Maharaj u khlem ioh lad ban wan bad u hap ban shu pynher lama masi hapoh liengsuin jong u.
Ki sengbhalang kiba wan tur ki long ka KSU, FKJGP, HYC, HITO, RBYF, CoRP, KJBWA.
Haba kren bad ki nongialam sengbhalang, kila pynpaw ba kim ym ailad ba ka kynhun ki Hindu kin wan ban tuklar ia ka kam ka dih, ka jingmane laitluid jong ki briew ha kane ka jylla.
U president ka FKJGP u bah Dundee Khongsit u la ong ba ki briew ki don lajong ka jingngeit ka rukom im, bad ym dei ban ailad ban wan ki Hindu shit niam kaba lah pynban ban wanrah ia ka jingthut ha ka shong suk shongsain.
Ha kajuh ka por, u la ong ba ka sorkar jylla Meghalaya ka khein sting palat bad lada dei ba ka sorkar ka shim khia, kumba leh ka sorkar Nagaland, ki sengbhalang kim donkam ban mih sha madan ban pyrshah ia u.
Ka seng Ri-Bhoi Youth Federation (RBYF) ka la pyrshah jur ia ka jingthmu ka kynhun ki Hindu ban ialap ban kam kmie ia ka masi bad ban khang doh masi ha kane ka jylla Meghalaya.
U Finance Secretary bah Frankie Kylla u la ong ba ka seng kan ym ailad ia kane ka kynhun ki Hindu ba kan wan ban khang bam doh masi bad ban pynkam kmie ia ka masi. U la ong ba ha kane ka jylla Meghalaya, ka doh kaba kham bang tam ka dei ka doh masi bad ki briew ki sngew tynnad bha ban bam doh masi bad ka dei ka rukom bam ka rukom jongki, ha kaba kiwei kim dei ban tuklar.
U bah Frankie ula ong ba ka seng kan ym ailad ba kane ka kynhun ki Hindu kan wan ban iuhkjat ha kane ka jylla ban khang bam doh masi.
Kumjuh ka seng Hynniewtrep Youth Council (HYC) ka la byrthen ba kan ym ailad satia ban wan iuhkjat ka kynhun ki Hindu kaba thmu ban pynkam kmie ia ka masi bad ban dawa kum ka kmie ka ri India.
U Vice President ka seng bah Francis Mawlong u la ong ba ka seng ka la pahara bha ha kylleng ki jaka hadien ba u heh kane ka kynhun Hindu u la thmu ban wan sha Meghalaya halor kane ka jingthmu bad u la ong, ba ka seng kan ym ailad satia ba un wanrah ia ka jingpynsngewthuh kaba bym iahap.
Kumjuh ruh ka seng ki nongshoh doh masi, ka Khasi Jaintia Butchers Welfare Association (KJBWA) ka la pynpaw ba ka jingsngew kulmar jingmut halor ka jingthmu ki shit niam Hindu ban khang ban doh ia ka masi namar ba kan ktah ia ka kam ka jam.
U President ka seng u bah Generous Warlarpih u la ong ba ka seng kan ym ailad ba kane ka jingthmu jongki kan wan ha Meghalaya. U la ong ba lada synshar mano mano ruh, ym don lah ban ong ba u Khasi un ym bam doh hynrei kin bam beit.
Ha kajuh ka por, u la ong ba ki briew ha kane ka jylla ki dei ban phai khmat sha kane ka kam ri masi shohdoh khnangban ym shaniah shuh na kiba nabar. U la ong ba ka sorkar ka la pynshlur ban ri dohkha, ri syiar, ri sniang hynrei ka donkam ruh ban pynshlur ia ki briew ban ri ia ki masi shohdoh khnang ban ym donkam shaniah shuh ia kiba nabar.