Shillong: U MLA ka HSPDP na Mawthengkut u bah Methodius Dkhar ula ong ba kum ki MLA ba dang shibit por, ka long kaba eh than ban lah ban bud ia ki dienjat jong u ma ieid Hoping Stone Lyngdoh hynrei kin iai pyrshang ban bud ia ki katba lah.
Ka HSPDP mynta ka sngi ka 26 tarik Nailur 2024, ka la kynmaw burom ia ka sngi khlad jong u bah Hoping uba dei u nongseng ia ka HSPDP ha shnong Mawkyllei, ka Eastern West Khasi Hills.
Haba kren ha kane ka sngi, u bah Methodius u la ong ba kum u MLA un pyrshang ban buddien ia ka dienjat jong u bah Hoping da kaba iarap ia ki briew, ban wanrah ia ki kam pynroi.
U la ong ba ki don kiba ong ba ki MLA ka HSPDP ki klet noh ia ki dienjat jong ki longshwa manshwa hynrei kam dei satia kumta bad kum ki nongmihkhmat, ki pyrshang katba lah ban bud ia ki dienjat watla kim pat lah ban kot sha ka kyrdan jongki.
Ka HSPDP ka la kynmaw burom ia ka lyngkhuh sngi iap kaba khyndai jong u bah Hoping uba dei uwei na ki nongialeh ban ioh ia ka jylla Meghalaya bad uba iai neh haduh ka sngi jingiap jong u ha kane ka seng kaba ula seng ha u snem 1968 ban ialeh ia ka Hill State.
U President ka HSPDP u bah KP Pangngiang haba kren ha kane ka sngi, u la jaw ummat ban kynmaw ia u ma ieid Hoping, hynrei watla um don shuh ha kane ka pyrthei, hynrei ki matti kiba ula buh bad ki lynti kiba u la ialam, kin long ki nongmuna ia ka pateng ban wan.
La ruh ia ka jingkren na ka pyrsa u bah Hoping ka kong Badariti L Nonglait, bad kiwei.
Ym pat lah kot sha ka kyrdan u ma Ieid Hoping, yn iai pyrshang, ong u MLA ka Mawthengkut
