Shillong: Ka surok hapdeng sor kaba ju iaid bun tam ki kali bad ki briew narum Bimola, ter ter haduh ban jan poi ha Motphran, ka neh sah ki thliew namar ba khlem maramot naduh ba la tih ban thep paip (pipe) um.
Ki kali kamai, ki hap ban iaid kiar noh na ka surok, namar tang shu bakla shi ksai, lah ban shah khrud ka khrum kali khamtam ki kali ba tbian.
La tih ia kane ka surok la kham slem bha ban thep ia ki paip um ka PHE kumba long lem sha kylleng ki jaka ha ka sor Shillong, hynrei kaba lyngngoh ka long ba khlem pyndap biang ia ka, haduh kine ki sngi. Ym tang ba ka la pynthut ia ka leit ka wan ki kali, hynrei ka wanrah ruh ia ka jingeh ia kiba iaid ba ieng ha kane ka thain namar ba hap ban kiar ia ka surok bad ruh na ki kali.
Sha kiwei ki jaka, shisien ba la dep ban thep ia ki paip, kila tap biang ia ka surok da kaba siang rong hynrei ha katei ka jaka, la shui eh beit kumto la slem haduh mynta.
Katei ka thain ka dei kaba khapngiah bha ki briew, kiba iaid da ki lak ngut man ka sngi bad kumjuh ki kali kamai kiba wan kit bad buh briew na kylleng ka sor Shillong bad nabar, namar ba ka dei ka iew ka hat.
Ka jingsniew kane ka surok khlem da maramot ia kaba tih, ka la long kum ka eitmat hakhmat ki nongwei kiba wan sha kane ka jylla, ban iohi ia ka jingitynnad, watla ka long myllen ia ki trai shnong kiba la hap ban iaid ban khnap man ka sngi na kane ka jaka.
Lano ki bor ba dei peit kin pynbeit ia kane, kaba donkam na bynta ki paidbah bad kiba bun kiba lang.
Hap kiar ki kali ia ka surok harum Motphran ba kylla nala naduh ba tih paip um
