Shillong: Ka seng Congress kala ujor sha u Lamphang ka iing dorbar thawain ka jylla pyrshah ia ki lai ngut ki MLA kiba la phet noh na ka seng dang shen bad ka ap ia ka rai na u Speaker shwa ban shim da kiwei ki sienjam.
Haba kren mynta ka sngi ka 20 tarik Nailur 2024, u President ka MPCC u bah Vincent H Pala ula ong ba lada kam iahap ia ka rai u Speaker, ka party ka la pynkhreh ban leit sha High Court bad wat shaduh ka Supreme Court ban dawa mait kyrteng ne ia ka jinglong MLA jong ki lai ngut ki MLA kiba phet seng kiba kynthup ia u bah Gabriel Wahlang na Nongstoin bad u bah Charles Marngar na Mawhati kiba la shah sospon bad u Dr. Celestine Lyngdoh u MLA ka Umsning marwei uba khlem shah sospon ha ka party.
Kine lai ngut kila leit iasoh sha ka NPP dang shen hadien ba kila phet noh noh na ka Congress.
Ka Congress ka la buh ka jingujor ar tylli, kawei pyrshah ia ki ar ngut ki MLA, kata ia u bah Charles bad bah Gabriel kiba la shah sospon bad kawei pat ka jingujor ka long pyrshah ia u Dr. Celestine uba khlem shah sospon.
U la ong ban phet seng ki dei ban ioh ia ka jingbun paid kaba 2/3 bynta katkum ka ain, bad lada kim ioh ia kane, kim lah ban phet seng bad ki shah trei ha ka ain.
U la ong ba ha ka jingialang ha ka 16 tarik Nailar 2024, u bah Charles bad bah Gabriel kim wan sha ka jingialang katba u Dr. Celestine u dang wan sha ka jingialang ka party ha katei ka sngi. U la ong ba kumno ki ong ba kila ai shithi ha ka 14 tarik haba ha ka jingialang ha ka 16 tarik, u Dr. Celestine u dang wan sha ka jingialang ka party bad kane ka paw ba ka don eiei kaba shu shna.
Lah ban kdew ba lai ngut ki MLA ka Congress kila phet sha ka NPP katba u bah Ronnie V Lyngdoh u MLA na Mylliem u sah marwei ha ka Congress.
Yn iakhun tyngeh ka Congress ban mait MLA ia ki 3 ngut kiba phet seng
