Shillong: U MLA ka BJP na North Shillong uba dei ruh u Chairman ka Meghalaya Tourism Development Corporation, u Bah Sanbor Shullai u la pynrem ia ka jingbyrthen ka All Assam United Motor Transport Association, ban sangeh pynpoi mar sha Meghalaya, kynthup ia ki marbam.
U la ong ba kane ka jingbyrthen jong katei ka kynhun ka long pyrshah ia ka jingiadei ba da ki spah snem da baroh arliang ki nongshong shnong, bad ka pynduh noh ruh ia ka mynsiem long shipara hapdeng ki Jylla ka thain shatei lam mihngi.
Na ka liang u Bah Sanbor u la kyntu ruh ia u Myntri Rangbah ka Assam uba dei u Convener ka NEDA, u Himanta Biswa Sarma ban shim kam ia kum kine ki jingbyrthen kiba lah ban ktah ia ki riewpaidbah.
Ha kawei ka liang u Bah Sanbor u la pynpaw ruh ba ka jingsngewkhia jong ki nongñiah kali tourist ka Jylla Meghalaya hapoh ka All Khasi Meghalaya Tourist Taxi Association ka long kaba dei, hynrei lada don kano kano ka jingbym sngewiahap la dei ban pynbeit da ki kynhun ba don bynta, da kaba shim nuksa ruh na kiwei ki Jylla, kum ka Sikkim bad Darjeeling ha West Bengal, ha kaba kiba don bynta na baroh ar Jylla ki mynjur ban don da ki kyndon ban iamyntoi lang.
U Chairman ka MTDC u la ong ruh ba ka Sorkar Jylla hapoh ka jingïalam Conrad K Sangma kum u Myntri Rangbah, ka la shim bun ki lynti ban pynkiew ia ka kam jngohkai hapoh ka Jylla, bad donkam ban shim ia ki kabu kiba la sorkar ka la leh, nalor ba ka kam jngohkai hapoh Meghalaya ka lah ban kot sha ka thong ha ki 10 snem ban wan, kata ban pynpoi haduh 50 lak ngut ki nongwan jngohkai ha ka shisnem. U la ong ba na ka bynta ka jingmyntoi lang jong baroh ar Jylla donkam ban don ka jingiasngewthuh jingmut hapdeng ki nongñiah kali tourist ka Meghalaya bad Assam.
Ba byrthen ka kynhun na Assam ban nym pynpoi marbam sha Meghalaya, pynrem u Bah Sanbor
