Shillong: U MP sha Rajya Sabha na Meghalaya u Dr. Wanwei Roy Kharlukhi u la ong ba ym lah ban len ba ka Voice of the People Party (VPP) ka mih ban pyni ba ka dei ka seng riewlum kaba khlaiñ hadien ba ka jop ia ka MP elekshon, hynrei u la ong pat ba ha ka elekshon ka don ka jingpher ha ka MP elekshon bad MDC.
Haba kren mynta ka sngi, u la ong ba ha ka politik ka jingkwah ka long ban iai neh bad ula ai nuksan ruh ia kiwei ki seng kum ka seng Congress kaba la hiar jrain namar ba kam don shuh ha ka bor.
U la ong ba ka NPP kan nym duh, bad ha ka MP elekshon ba dang shu dep, ym tang ka NPP baroh ki la shah rem lut ha ka VPP, bad bynrap ka ha ka politik ka jingkylla ka wan ha kano kano ka por bad ula iathuh ba u la iakren kai bad bah Adelbert Nongrum (MLA) ka VPP ba u Blei um ju kyrkhu shiliang, u kyrkhu ia u Mukul, kyrkhu ia u Conrad, u lah ban kyrkhu sa iano re, ym lah ban tip.
Halor ka jingkylli ia ka Congress, u Dr. Wanwei u la ong ba lada ka Congress ka jop ha ka elekshon MLA ha Bihar ha 2025 bad ha UP ha u snem 2027, ka lah ban khie khlieh biang hynrei lada ka rem, kan ngam biang.
U la ong ba ka jingkynnoh ia u bah Vincent H Pala ba hiar ka Congress, kam dei kaba shisha namar ba ha Garo Hills, pat jop ka Congress ha ka jinglong nongialam jong u bad ha ka politik ki iapyni beit tang ia kaba jingtlot.
Halor ka jingmih khubor ba un resain noh ia ka kam MP, u Dr. Wanwei ula kyntait da kaba ong ba ka dei tang ka jingmut dur jong u nongthoh.
U Blei um ju kyrkhu shiliang, ong u MP ka Meghalaya
