Shillong: Ka seng kiba iakhun ban lait na kaba ngop ha u drok, ka Meghalaya Users Forum ka la pyrshah jur ia ka jingdawa ka seng Hynniewtrep Youth Council (HYC) ban pynkynriah noh ia ka Opioid Substitution Therapy (OST) Centre na Civil Hospital, Shillong.
Ha ka jingkren mynta ka sngi, u President ka seng, u bah Barry Kharmalki u la ong ba lada pynkynriah ia katei ka centre kan ktah ia kiba ngop ha u drok kiba leit shim dawai bad kawei ruh kan long kum ka jingshah niew ia ki.
U la ong ba kane ka centre kam dei tang kaba ai dawai ia kiba la ngop ha u drok hynrei ka la ai ka jingshakri ha kiba bun ki bynta ban pyllait ia kiba la ngop ha u drok. Ia kane kila pynsngew ha ka myntri ka tnad ka koit ka khiah ka kong Ampareen Lyngdoh.
Ha kajuh ka por, u la ong ba ka sienjam kaba la shim ka seng HYC kan ym long kaba jop khlem ka iatreilang jong baroh namar ba kum kane ka sienjam ban shu beh bad byrthen da ka rukom kaba khor, la dep leh 10-20 snem mynshwa ha kiwei ki jylla kum ha Nagaland, Manipur, Mizoram hynrei kam shym la urlong kaba jop. U bah Barry u la ong ba kaba donkam ka long ban tei ban iasyllok da ka jingieid, da ka jingiasngewthuh jingmut, ban shim kum ki para ki hynmen.
Ula pynpaw ia ka jingsngewnguh ia ka sorkar kaba la rai ban pynneh shwa ia katei ka OST Centre ha Civil Hospital, Shillong.
Ula pynpaw ia ka jingsngew lyngngoh ba ki nongialam ka HYC kim treh ban iashong jingialang bad ki nongialam ka Meghalaya Users Forum ryngkat ka myntri ka tnat ka koit ka khiah.
Pyrshah ka seng Meghalaya Users Forum ia ka jingdawa ka seng HYC ban rah ia ka OST Centre na Civil
