Shillong: Uwei na ki samla Khasi u rang ialehkai kynjatbol na ka kynhun Northeast United FC u samla Redeem Tlang ula pynpaw ia ka jingsngewkmen namar ba ka jingtrei shitom jong u ka la lah ban kyntiew ia u sha ka thong ha ka jinglehkai phutbol.
U samla Redeem ula iathuh ba mynshwa ha ka por ba u dang don ha ka Shillong Lajong Academy u ju don ia ka thong ba un ioh ban ialehkai ha ka I-League.
Ula iathuh ba ka jingioh mynsiem jong u kadei naduh ba u leit ban sakhi ia ka jinglehkai ba nyngkong eh jong ka Shillong lajong ha ka I-League.
Halor ka jingjop ka NE FC ia ka lympung Durand Cup, u Redeem ula pynpaw ia ka jingsngewkmen ba kane ka jingjop ka dei ia ka thain Northeast baroh kawei bad kane ka dei ka sien ba nyngkong ban iohrah ia ka Durand Cup.
Ula ong ruh ba lada wanrah ia ka ISL ha kane ka jylla kan long ka jingkyrkhu ia ki paidbah kiba ieit phutbol ha kane ka jylla namar kane kadei ka league kaba heh duh ha India
Haba kylli halor ka jingkiew ka phutbol ha kane ka jylla, u Redeem ula ong ba mynshwa ka don bun ka jingduna hynrei mynta kaba dang iaid ki sngi ki snem, ka sorkar ka dang iarap ia ka phutbol naduh ki khynnah rit bad ula kyntu ia ki khynnah ba kidei ban trei shitom ban iai shah haduh da poi sha ka thong.
Ioh mynsiem u Redeem na ka I-League ban poi syndon sha ka ISL na ka North East United
