Shillong: Saw ngut ki runar kila shah kem halor ka jingkynnoh donkti ban dawa pisa na uwei u briew u bym pynpaw kyrteng da ki pulit na Madanrting Shillong.
Ki 4 ngut kiba la shah kem ha ki pulit ki dei kiba la tip kyrteng kum u Garnett Gedian Khongwir 30 snem bad u Kyrshanbor Lyngdoh 38 snem kiba dei ki dkhot ka HNYM. Kiwei pat ki long u Thounaujam David Singh 41 snem bad u Narendra Kabrambam 29 snem ka rta.
Katkum ka kyrwoh na u Superintendent of Police ka East Khasi Hills, ha ka 8 tarik Nailar, uwei u briew u la phone ia u nongjujor, bad dawa pisa haduh T.10 lak. Hadien kane, kila iai phun ban dawa ban ai ia katei ka 10 lak tyngka. Hadien ba u nongshah dawa pisa um shym la kohnguh, uta u nongphone bad 2 ngut ki runar ki la leit prong ha ïing jong u ha ka 20 tarik Nailar ha ka por 7 baje janmiet, da ka jingthmu ban dawa pisa, bad namar ba uba shah dawa um don ha ïing kitei ki runar ki la byrngem byrsit ia ka khun kynthei kaba don ha ïing.
Halor kane, hadien ba la ioh ia ka jingujor ejahar ha ka 24 tarik Nailar, ki pulit ka Madanrting police station ki la pynlong ia ka jingtohkit la kem syndon ia kitei ki saw ngut.
Byrngem ki runar ia ka khun, bym lap ia u kpa ba ki dawa pisa T. 10 lak
