Shillong: Ka Khasi Hills Autonomous District Council (KHADC) ka la sngew bitar jur ia ka jingthmu ka kynhun Gau Pratishtha Andolan ban pynlong ia ka jingiaid paidbah ha ka 2 tarik Risaw ha Shillong ban khang bam doh bad shoh doh masi bad ban ithuh ia ka masi kum ka Kmie ka ri India.
U Chief Executive Member ka KHADC, u Bah Pyniaid Sing Syiem u la pyntip ba ka KHADC ka la shong ia ka jingïalang ba kyrkieh bad la rai ban thoh sha ka Sorkar Jylla ba kan bthah ia ki bor district ba kim dei ban ai jingbit ia kum kine ki jingthmu. U la ong ba ka Council ka pyrshah jur ia kane ka jingthmu ban iaid rally ha ka 2 tarik u Risaw, namar ka lah ban wanrah ka jingmynsaw.
U la ong ba ka KHADC nangne shakhmat kan khang pyrshah ia kino kino ki kynhun lane ki briew kiba wan ialap khang bam doh masi ha ri Khasi ban wan tuklar kiwei ia ka rukom bam rukom im jong ka jaitbynriew.
U la ong ba ka daw ba ka council ka khang pyrshah kumba la leh ia ka UCC ka long ba ka ri Khasi ka don bun ki riti ki dustur, bad ka jingkhang bam doh masi ka long ka bym lah ban pdiang namar kadei ka rukom bam kaba naduh hyndai, bad da lei lei kan nym ailad ba kino kino ki kynhun kin wan ban batai ia ka rukom bam.
U la ong ba kane ka jingpynbeit ba hap ban phah jingthoh sha ka Sorkar ka long namar 98 percent ka jaka ha Meghalaya ka don hapoh ka Sixth Schedule bad lyngba kane la kyntu ia ka Sorkar India ba kam dei ban pyntreikam ia ka UCC.
Bitar lep ka KHADC ba thmu pynlong kmie ka ri India ia ka masi
