Shillong: U bah Ardent Miller Basaiawmoit u la ong ba ka jingkren jong u ia ka ktien expiry date ne ka dawai ba la kut por ia ka jingpynjlan ia ka samoi MDC ka KHADC bad ka JHADC ka lah ban dung bad tynrah ia ki MDC haduh ba kila sngew mong.
Haba kren mynta ka 13 tarik Nailur 2024, u bah Ardent ula ong ba ula pyndonkam ia kane ka ktien khamtam ia ka Executive Committee kiba shim ia ka kabu ban pynjlan ia ka samoi jinglong MDC, ka syriem kum ki mar ki mata kiba la kut por. U la ong ba lehse ba kane ka ktien ka la dung ka la tynrah ia kita kiba bat ia ka bor bad ki sa sdang ban kynnoh ia u, hynrei ki paidbah ki tip ia ka nongrim jong u bad u tip ia ka ain ia kaei kaba dei ban leh.
U la ong ba ka jingkynthah ia u ba u iehnoh ia ka kam MDC, kam don jingsnoh satia namar ba naduh nyngkong um sngew tynnad ban bat ar maloi bad u la kyntait la ar sien ban iakhun MDC na Nongkrem watla ki paidbah kila pynbor ia u hynrei dei ha u 2014 ba ula pyndem ha ka mon jong u paidbah ban iakhun MDC wat ha ka jingshisha um kwah ban iakhun ban bat ar maloi.
Dei na kane ka daw, ba ha kato ka por, ula iehnoh ia ka jinglong MDC namar ba um pdiang ia ka nongrim ban bam ar maloi. U la ong ba la dei ban ailad lang ia ki samla ban mih shakhmat namar ba ka synshar paidbah kam dei ka nongkynti jongno jongno hynrei ka dei jong u paidbah bad ka VPP ka kwah ban sei ia ki nongialam.