Shillong: U President ka Voice of People Party (VPP) u bah Ardent Miller Basaiawmoit uba dei ruh u MLA ka Nongkrem, um sngew iahap ia ka jingai daw ba ka jingrem dor ki marbam ha kane ka jylla ka dei namar bym don ka lynti rel.
Haba kren mynta ka sngi 13 tarik Nailur 2024, u bah Ardent ula ong ba ka jingkiew dor ka doh masi, hato yn kynnoh bym don ka lynti rel ne na ka jingkyrduh masi. U la ong ba ka seng ka la kwah ban iatai hapoh ka iing dorbar thawain ban ioh ia ka jingshai hynrei khlem ailad, khnang ba ka sorkar kan ka jingshai.
Mynta ka sngi ka VPP ka la pyllong ia ka jingshong kyrain ha madan Malki halor ka jingkiew dor ki marbam.
Ki don ki dor kiba ka sorkar ka la buh hynrei lada thied ia ki ha Iewduh kam iahap satia. U la ong ka dor kaba la buh ka sorkar Meghalaya ka dor u khaw ka long T.45 katba lada thied ka long T.50 ha ka 24 tarik Nailar 2024. Ka umphniang bam T.150 katba ka dor ha Iewduh T.180. Ka dor doh masi ka long T.500 ha Iewduh bad ka khmat lbong lei ka poi T.600 katba ha Mukachung ha Nagaland ka dor doh masi ka long T.300.
Ha ka jingshisha ha kiwei ki jylla riewlum kum ha Mizoram, Nagaland ki bym don rel ruh ki dor ki marbam ki kham tad ban hangne ha jylla Meghalaya.
U la ong ba kiwei pat ki daw kiba pyllong ia ka jingkiew dor ki marbam, ka dei namar ka jingkharoi ki khyrdop khrong pisa, ka jingkhrong pisa, ka jinglong jem kum ka jaitbynriew kaba shu kut haba shu khnium, ym kum kiwei ki jylla kiba lada kiew dor shipiah ruh ki briew ki mih ban iapyshah.
U la ong ba kane ka dei tang ka jingsdang ban iakhih bad nangne shakhmat ka seng kan shim da kiwei ki sienjam na bynta ka jingbit jingbiang u paidbah.