Shillong: Ki Pulit ka Ri-Bhoi District, kila ioh kem ia 4 ngut ki runar kiba dawa pisa jubor na ki kali kit mar khamtam ki kali kit syiar, dohkha ha surok NH-6. Ia kine ki runar la kem hynne ka step phyrngap ha ka por shi baje shipowa eiei na ka thain Pahamsyiem, Nongpoh.
Katkum ka kyrwoh ba la phah da ki pulit la iathuh ba kine ki saw ngut kidei kiba la tip kyrteng da u Ricky Tangsang (26 snem) ba sah ha Sajer, Nongpoh, u Mustafa Lyngdoh (23 snem) na Umlyngkdait, u Shem Warjri (27 snem) na Umsning Proper A, bad u Kyrshanbor Marwein (22) na Mawroh, Nongpoh.
U Superintendent of Police ka Ri-Bhoi, u Jagpal Singh Dhanoa u la pyntip ba ki pulit kila ioh jingtip ia ka jingdon kane ka kynhun la ar ne lai bnai na ki nongniah kali kit mar kiba la ujor ba ki shah lute ha surok NH-6. La ong ba kine ki runar ki ju lute naduh ka pisa, ka mobile bad kiwei kiwei ki mar rem dor nalor ba ki shoh ki bom bad byrngem byrsit ia ki nongniah kali.
La iathuh ba kine ki runar ki ju bat ia ki kali kit mar ha ki surok kiba kham kynjah bad khongdong jong ka surok NH-06 khamtam ha ka por mynmiet. Namar kane ka jingdon kine ki runar ki pulit ka District kila pynlong ia ka jingtohkit kaba bniah bad kila thwet ruh ia kane ka kynhun da kaba pynlong ia ki jingiaid pahara ha National Highway.
La iathuh ba hynnin ka miet 10 tarik Nailur, katba ki pulit ki dang iaid pahara, kila ioh jingtip ia ka jingshah lute jong kawei ka Bolero pickup ba kit dohkha ha ka thain Shangbangla. Kine ki runar kila bat ia u nongniah bad u nongbud bad kila shoh shuwa ba kin lute bad knieh ia ki mobile phone.
Ki Pulit haba ioh jingtip ia kane ka jingjia, kila her wut wut sha katei ka jaka ban tohkit bad hadien kila ioh bat ia kawei ka Maruti Alto ha ka thain Pahamsyiem halor ka jingsuba donkti ha kane ka kam bad kila kem ruh ia arngut ki runar kiba kyrteng u Ricky Tangsang bad u Mustafa Lyngdoh
La iathuh ba u Mustafa ula ioh phet na katei ka jaka hynrei da ka jingkthong tyngeh ki Pulit ryngkat ka jingiarap ka kynhun Special Team bad ki CRPF, ki Pulit kila ioh ban bat noh ia une u runar.
Ki pulit ki la pyntip shuh shuh ba ki arngut kila phla ia ka jingdonkti sa arngut kiwei pat ha kane ka kam runar bad ki Pulit kila leit khynra bad ioh kem noh ia baroh 4 ngut.
Ki Pulit kila kurup ruh ia artylli ki kali ba pyndonkam da kine ki runar kiba kynthup ia ka Maruti Alto ba don u nombor AS01-FN-4202 bad kawei ka Baleno ka bym don nombor satia.
Ki Pulit ka Ri-Bhoi kila register case ia kine ki 4 ngut ha Nongpoh Police Statin hapoh ki kyndon bapher bapher jong ka aiñ BNS.
Ngat saw ngut ki snar nonglute kali na surokbah ha kti ki pulit Ribhoi
