Shillong: U Deputy CEM ba khmih ia ka tnat Elaka ha KHADC, u Bah Pynshngaiñ N Syiem u la pyntip ba ka executive committee ka la rai ban ai kawei ka kamra treikam hapoh ka ophis jong ka Council sha ki khlieh nongsynshar, kynthup ia ki Syiem, ki Lyngdoh, ki Sordar, ki Sirdar, ki Wahadar khnang ba kin lait ap shabar haba ki leit donkam ha KHADC.
U Deputy CEM u la ong ba ka long kaba ibiej ban iohi ia ki khlieh nongsynshar ba kin shong ap ha ki tyngkong baranda haba ki leit donkam ha KHADC, bad na ka bynta ka bit ka biang jong ki ka council ka la pynkhreh ia ka kam kaba ki lah ruh ban treikam.
Shuh shuh u Bah Pynshngaiñ u la ong ba ia kane ka kamra yn aiti da u CEM, Bah Pyniaid Sing Syiem ha ka 13 tarik mynta u bnai, ha kaba u la pyntip ruh ban buh uwei u nongtrei (peon) u ban iarap pynbiang ia ki jingdonkam jong ki.
Ka ibiej ban pynap ia ki Syiem ha lynti iaid, da ka kamra treikam ha KHADC yn ioh ki khlieh nongsynshar: PN Syiem
