Shillong: U myntri rangbah ka jylla uba dei u President ka NPP u Conrad K Sangma u la kyntait ia ka jingkam u Dr. Mukul Sangma ka TMC, ba ka dei ka jingialeh dohiap ka NPP ban shu thied ia ki MLA na kiwei ki seng bad kan sa bthai ha kawei ka sngi.
Haba kren mynta ka sngi, u Conrad u la ong ba ka jingong u Dr. Mukul ka long kumba u la sngew kutlad ialade, lehse um sngew skhem ialade bad ha ka party jong u. U la ong ba ka jingwan rung ki MLA na kiwei ki seng sain pyrthei sha ka NPP, ka dei ka jingkyrkhu bad ka party ka sngew nguh ia kane.
U la ong bay m dei ban sngew ehrang ne sngew khlain hynrei ka dei ban kham jur shuh shuh ka jingsngew rit jongki ban wan iasoh sha ka NPP bad ka jingshaniah jong u ia ka sorkar bad ka NPP. U la ong ba ka jingwan iasoh jongki ka dei ka kdew shai ia ka jingsngew skhem bad ka jingshaniah jongki ha ka sorkar. U la ong ba lada kim don ka jingshaniah ia ki MLA ka NPP, kiwei ki MLA na kiwei ki party kim ym wan iasoh.
Lah ban kdew ba lai ngut ki MLA na ka Congress, kila iasoh sha ka NPP dang shen. Shwa ia kane, 2 ngut ki MLA ka PDF kila rung sha ka NPP bad mynta ka NPP ka la kot sha ka 31 ngut ki MLA ban ioh ia ka jingbun paid marwei ha ka iing dorbar kaba 60 ngut ki MLA.
Halor ka jingkynnoh jong u Dr. Mukul ba donkti u symbud myntri rangbah bah Sniawbhalang Dhar ba u donkti ha ki kam drok beain, u Conrad u la ong ba kane ka jingkren ka long kaba sngewsih ban mih na shyntur jong u namar ba kam don nongrim haei haei ruh.
U la ong ba ka jingkynnoh ka long kum ka jingpyrshah ia ka ri, namar ba ka sorkar kam shym la shongkli kti ban shu rat dyngkhong ia u drok. Ula ong ba ka long kaba bym mut dur ba kat ka kyrdan u Dr. Mukul un pyndonkam da ki ktien ki bym iahap satia.
Ka jingkam u Dr. Mukul ka long kumba kutlad/ula pyndonkam ki ktien pohdor ban kynnoh ia u Dy. CM, ong u Conrad
