Shillong: U nongialam ka NPP uba dei ruh u CEM ka KHADC u bah Pyniaid Sing Syiem u la khoh snep ia ka party Voice of the People Party (VPP) bad kynthoh ia u President ka VPP u bah Ardent Miller Basaiawmoit ba wat long kum u bula ne nongleh circus ban shu pynthap kti ia kiwei khlem mih soh eiei.
Haba kren mynta ka sngi ka 3 tarik Nailur 2024, u bah Pyniaid u la ong ba u nongialam ka VPP u long kum u Bula ha ka tamasa bula, ban shu pynthap kti, pynkmen ia ki briew, shu pynkhih shnong hynrei ha kaba kut khlem mih soh eiei uba bha.
U la kynnoh ba ka VPP ka la wanrah ia ka jingisih, ka jingiashun para briew haduh ba la isih ia ki nongialam shnong, ia ki nongialam balang bad kane kam pat ju jia mynno mynno ha ka jaitbynriew.
U la ong ba ki paidbah kin kylli, u soh aiu ba kine ki MLA ka VPP kila wanrah ha ka konstitwensi bad ha ka jaitbynriew namar ba haduh mynta u soh jong ki, ka long ban shu wanrah ia ka jingisih ia ki para briew.
Ula ther ruh ia u bah Ardent uba la risain noh na ka kam MDC ha kato ka por, khlem pat kut por tang namar ba um sngewthuh ia ki ain, bad u la ong ba kham lah ki MDC kiba la kut por kiba dang treikam, kiba dang shna ain ban ia kito ki MLA ne MDC u bym sngewthuh ia ka bor ka iktiar lajong uba shu risain shiteng por khlem sngewthuh ia ka duh ka dang.
Ha kajuh ka por, u la ong ba ka jingpynjlan ia ka samoi treikam ki District Council ka long katkum ka riti synshar. U la ong ba ka Council ka la thaw ia ka Delimitation Committee ban pynwan dur thymmai ia ki konstitwensi ka dei hadien ba la ioh ia ka jingdawa na ki paidbah. watla ka jingpynbeit thymmai kam long kaba hun ia baroh hynrei ka Council ka leh hadien ba ka la ioh ia ka jingthoh na ki paidbah.
Ha ka jingshisha, ka Council ka la dep ban pynkhreh hynrei ka shong ha ka sorkar jylla ba kan rai namar ba dei ha ka sorkar jylla ban pyllong ia ka elekshon MDC. Dei na kane ka daw, ba ka sorkar ka la rai ban pynjlan ia ka samoi ki MDC. U la ong ba lehse ka sorkar jylla ka pynjlan biang mynta ka dei na bynta ban pynkhreh ia ka elekshon.