Shillong: U President ka NPP Meghalaya, u bah Prestone Tynsong, ula ong ba ka NPP hapdeng ka jingshah kren shah bein ha ki paidbah laiphew jait hynrei ka la nang kiew.
Mynta ka sngi, ka NPP ka la rakhe ia ka sngi seng jongka ha State Central Library, Shillong ha kaba la ki nongialam ka Party kila sakhi lang khrui.
Haba kren ha ka jingialang, u bah Prestone uba dei ruh u symbud myntri Rangbah ula ong ba ma u bad kiwei 7 ngut kila iasoh sha ka NPP ha u snem 2018 shwa ka elekshon bad ha katei ka elekshon ki jop 19 ngut bad kila ioh ban ialam ia ka sorkar. Bad hadien kane, ha ka elekshon 2023, ka NPP ka la jop 8 ngut na Khasi-Jaintia Hills bad 18 ngut na Garo Hills hynrei hadien ka elekshon ka la kot sha ka 31 ngut hadien ba la wan iasoh 2 ngut ki MLA ka PDF bad 3 ngut na ka Congress.
U la kop ba shen ka NPP kan nang kiew jingkhein shuh hadien ka elekshon shiteng samoi kaban long ha Gambegre konstitwensi.
Ha kajuh ka por, u la ong ba ula ioh khubor malu mala ha ki sngi kiba la dep ba don kiba bun kin mih noh na NPP hynrei ia kata ym lah ban rung ha dohnud briew, hynrei lada ka party ka la jop ha u snem 2018 haduh 2023, ula iathuh lypa ba ha 2028 ka party kan jop kham bun.
Ka kyrteng Crowborough Hotel, la kynroi prie, mynta pat da iaid na Khyndai Lad, kumba iaid sha ri phareng: Prestone
U Symbud Myntri Rangbah u la pyrto ruh ia ki kam ba radbah ka sorkar kaba ialam ka NPP ym lah shuh ban niew tang, hynrei ki briew pat ki la lapmiet ban lynthem maw pynban.
U bah Prestone u la pynkynmaw ia ka Crowborough Hotel ha Khyndai Lad, kaba la sahteng da ki phew snem naduh ka por ba u dang leit klas haduh ba u la long haduh u snem 2013, bad bun kiba kynroi prie ban ioh sngew ia ka kyrteng kane ka hotel, hynrei hadien ba la wan shimti ka NPP ia ka sorkar, ka kylla Five Star Hotel pynban kum sha ri phareng.
Ula ong ba mynta ki briew haba ki iaid ha Khyndai Lad, kin sngew kumba iaid sha ri phareng ban iohi ia kane ka Five Stare Hotel. Shuh shuh ula ong ba kawei pat ka Five Star ka Marriot ka la long ka nongmuna ba radbah ka sorkar NPP. U la ong ba ym pat phohsniew ban iohi ia ka Swimming Pool hapoh Hotel hynrei ha Marriot yn ioh ban iohi ia ka Swimming Pool ban leh kmen hai re hai, kaba ithiang kaba itynnad bad ula buh jingkylli, mano ba leh ia kane. Nangta u la ong ruh ba ka Lariti Performing Arts ha Mawkasiang, kaba hehm tam ha ka jylla, mano ba leh, ka IT Park ha New Shillong bad bun kiwei ki kam ba radbah bad ki briew ki dei ban leit peit ban iohi ia ka jingshisha namar lada ong u Conrad, u Prestone kin ong kiba thok, hynrei kaba sngew lyngngoh ka long ba don kiba ong ba kin leit iasoh noh sha u Prah, ne sha iasoh noh sha kata kata ka party hana ba ka party NPP ym long shuh.
Hynrei u bah Prestone u la ong ba ma u shimet, lada long sa kumno kumno ruh un sah marwei ruh kampher namar ba ka party kaba la ai ia ka identity haduh katne ban kyntiew ia ka jylla.
U la ong ba ha une u snem ban wan, ka dorbar ba nyngkong kan long ha ïing dorbar thymmai, mano ba leh, dei ka NPP kaba pynkylla dur ia ka sor Shillong baroh.
Da kaba pyrto ia ka jingshlur bad ka jingkikthlieh ka sorkar NPP kaba ialam da u myntri rangbah u Conrad K Sangma ban tara wat ia ka mat pynbeit pud, u bah Prestone Tynsong u la ong ba mynshwa ha ka por ba u long myntri sorkar ha ka Congress, haba ki leit iakren pynbeit pud bad u myntri rangbah ka Assam, ki hap ban shu khaprip ngain ngain tang ban peit bha ruh ym nud ia u myntri rangbah ka Assam bad ka kut tang ha ka jingiadih sha.
U la ong ba man ba ki iakren pynbeit pud, ka jingialang ka la shu kut haba iadih sha bad ynda la dep dihsa kila shu pynbna ba la rai rangbah ban shu pynneh kumba ka long ne status quo.
Katkum ka jingong u bah Prestone, kat ka rai rangbah ban shu pynneh status quo, ka bym poi sha bneng ne sha khyndew, ka long kaba thamula.
Hynrei ha ka sorkar kaba ialam u Conrad ba ka la shim ia kane ka mat bad la pyndep 6 tylli na ki 12 tylli ki jaka kiba iaknieh. Hynrei ki briew kila kynnoh ba u Conrad bad u Prestone kila die ia ki jaka da ki hajar kilometre sha ka Assam, tangba kampher, namar ba uba najrong u iohi.
Niew u bah Prestone ia ki kam bah ba la leh ka sorkar NPP naduh 2018
