Shillong: U myntri ka tnad jngohkai ka jylla u bah Paul Lyngdoh u la ong ba ka sorkar ka la theh pisa bha na bynta ban kyntiew ia ka kam jngohkai ka jylla kaba kyntiew ia ka ioh ka kot jong ka jylla.
Haba jubab halor ka mat kaba la wanrah u MLA ka Nongpoh u bah Mayralbon Syiem hapoh ka iing dorbar mynta ka sngi, u bah Paul u la ong ba ka jingshah pynthut ki nongwankai ha Umtyngngar ha u bnai ba la dep ha kawei ka seng bhalang, ka HNYF ka la ktah ia ka karkhana jngohkai.
Na kane ka jingshah pyndik, ka jingwan ki nongwankai ka la hiar jain rynjain sha ka thain Sohra, Pynursla, Dawki haduh kumba 30 percent bad 50 percent ha ka sngi kaba bud.
Ban pynkhlain shuh ia ka kam jngohkai, ka tnad kam jngohkai ka jylla ka la pyllong ia ka jingiathir bad ki nongpyniaid kam jngohkai dang shen, ha kaba la iathir ia ki mat kiba ktah bad kumno ban pyllong ia ka kam jngohkai kaba neh bad kaba tyllun.
U myntri u la ong ba ka sorkar kan pynkhreh ban pynbiang ia ka jingiaid ka internet bad ia ka bording ha ki jaka bym biang bad halor kane ka la pan jingtip na ki Sub-Divisional Officer ka Sohra, Pynursla bad ka Amalarem.
Ka tnad jngohkai kan pyntreikam ruh ia ki pulit pahara nongwankai ne ki tourist assistance. Ym tang katta, ka sorkar kala pynkhreh ban pynbha ia ki jaka jngohkai kiba thymmai ha West Khasi Hills, Eastern West Khasi Hills, South West Khasi hills, Ribhoi bad ha East Jaintia Hills.
Ban kyntiew ia ki samla kiba angnud ha kane ka kam jngohkai, ka sorkar ka la pyntreikam ia ka Meghalaya Home Stays Scheme kaba iasoh lang bad ka PMEGP ban shna ia ki iing basa ha kaba ka jingiarap kan long 70%. Haduh mynta ki don 633 tylli ki iing basa kiba la mang pisa ha kane ka skhim bad ki don ruh kiwei ki skhim kum ka Prime Tourism Vehicle Scheme.
U bah Paul ula pyntip ba ka jingpyntreikam ia ka Meghalaya Eco Tourism Infrastructure Development la ioh T.730 klur lyngba ka New Development Bank ban tei ia ki jaka jngohkai ha Sohar, Shillong bad ha Tura. Ka la ioh ruh T.60.29 klur na ka Swadesh Darshan 2.0 ban pynbha ia ka Meghalayan Age Cave Experience bad ka Water Fall Trails ha Sohra. Shuh shuh u myntri ula pyntip ba la ioh pdiang ia ka pisa T.50 klur na ka Ministry of Tourism hapoh ka skhim Challenge Based Destination Development.
Katkum ka jingong u myntri, ki don 50 hajar ngut kiba ioh jingmyntoi na ka kam jngohkai ha ka jylla.