Shillong:U myntri ka tnad Social Welfare ka jylla u bah Paul Lyngdoh ula pyntip hapoh ka iing dorbar mynta ka sngi, ba ki Khasi-Jaintia ki don 14.13 lak ngut kaba long 48.68 percent katba ki Garo ki don 8.21 lak ngut kaba kot sha ka 27.67 percent bad kane ka long katkum ka kaiphod na ka National Commission for Schedule Tribe ha u snem 2011.
Kiwei pat ki Schedule Tribe ki don 3.21 lak ngut kaba kot sha ka 10.8 percent.
Ia kane ka mat la wanrah u MLA ka North Shillong u bah Adelbert Nongrum ha ka dorbar synrai mynta ka sngi.
Kane ka mut ba na ka jingdon briew kaba 29 lak ngut tam, ki Schedule Tribe baroh ha Meghalaya ki don 25 lak ngut tam kaba kot sha ka 87.9 percent ha u snem 2011.
U la ong ba ha u snem 1999, ka sorkar jylla ka la pdiang ia ki kyndon ban kynthup bad ban weng ia ki jaitbynriew ha ka thup Schedule Tribe, ha kaba ka sorkar jylla, u National Registrar of India bad ka National Commission for Schedule ki don ka bynta kaba khraw.
Na ka liang u bah Paul ula pynthikna ba ka sorkar kan thaw ia ka Departmental Committee ban pynbeit ia ki jingdkoh halor kane ka bynta, ban bishar ia ka jingioh rung kiwei ki jaitbynriew kum ki Schedule Tribe ha ka jylla Meghalaya bad ia kane yn pyndep hapoh lai bnai. Ula pynthikna ba yn iasyllok ia ki nongmihkhmat, ki District Council halor kane ka bynta shwa ban phah sha u National Registrar of India.
Hadien ba la sngew hun bad kyrmen ba ka sorkar kan leh kumba ka la kular, u myntri ka social welfare, u bah Adelbert ula weng noh ia kane ka resolution.
Shwa ia kane, u bah Adelbert u la dawa ba dei ban bishar biang ia ka Part XI ka Schedule Caste ka Riti synshar ka ri India katkum ka hukum 1950, ka donkam ban bishar biang. Khlem da isih ia kiwei pat ki paralok riewlum ha kane ka thain shatei lammihngi, u bah Adelbert u la ong ba ka la donkam ban bishar biang ia kane ka kam, kaba mut ba dei ban weng noh ia ki na ka thup kum ki Schedule Tribe ha ka jylla Meghalaya ba kynthup ia ki Mizo, Naga, Tripra, Hmar, Karbi, Kuki.
Ki don 17 tylli ki riewlum ne Tribe ha Meghalaya katkum ka jingpynbna ka u President ka India ha u snem 1950, kiba kynthup ia Chakma, Dimasa, Kachari, Garo, Hajong, Hmar, Khasi, Kuki, Lakher, Man, Mizo, Mikir, Naga, Bowri, Synteng, Koch, Rabha.
Ha u 2011, ki Khasi-Jaintia ki don 14 lak, ki Garo 8 lak ngut ha Meghalaya
