Shillong:Ka Science & Commerce College ha Mawphlang ka dang sah khongreng mynta wat hadien ba la iaid ka jingtei sha ka 7 snem eiei mynta.
Shi bynta ban pynkyndit bad ban dawa na ka sorkar ban pynsted noh ban pyndep ia ka, ka KSU Mawphlang unit mynta ka sngi ka 27 tarik Nailar 2024, kala leit jurip ia katei ka college bad ka lap ba ka jingpyntrei ka long kaba suki haduh katta katta.
U General secretary ka KSU Mawphlang u samla Baniengskhem Kharbani ula ong ba u myntri ka tnad pule puthi u Rakkam A Sangma, ula thok ia ka seng namar ba mynshem snem ula kular ban pyndep noh ia kane ka college hapoh san bnai eiei bad ban sdang noh ia ka klas hynrei khlem urlong satia haduh mynta.
Ia kane ka college la buh maw nongrim u myntri rangbah barim ka jylla u Dr. Mukul Sangma ha u snem 2017 bad la sdang ban tei ha u snem 2019 bad la mang T. 36 klur.
Mynshem snem u MLA ka Mawphlang u bah Mathew Beyond Kurbah ula rah ia kane ka mat hapoh ka ïing dorbar namar ba ka la suki ka jingpyntrei.
U samla Baniengskhem u la ong ba ka jingtrei ia kane ka college ka la suki palat bad ki nongtrei ki don tang khyndiat bad ula buh jingkylli, lano kan pyndep ia kane ka college kaba la donkam eh na bynta ki samla ka thain. U la ong ba ka seng kan iai buddien khnang ba ka sorkar ka dei ban pyndep noh kloi bad ban plie noh ban sdang ia ka jingai jinghikai.
Dang sah lyngkrang ka Science & Commerce College ha Mawphlang
