Shillong: U nongialam ka TMC Meghalaya u Dr. Mukul Sangma ula kam ba ka jingpynhiar tin sop ïing ka NPP ban sam sha ki longïing sha Gambegre constituency, ka jur bha ha kine ki sngi.
Haba kren sha ki lad pathai khubor ha ka 23 tarik Nailar 2024, u Dr. Mukul u la ong ba ki paidbah ki dei ban tip, ha kano ka rukom ka NPP ka pynhiar tin da ki bun kali ban leit sam tin sha ki paidbah, hato ka dei kaba sam na kano kano ka skhim ne ka dei kaba shu thied nokot da mano mano.
Kane ka jingwohnia u Dr. Mukul ka long ba ka Gambegre constituency kan leit sha ka elekshon shiteng samoi shen hadien ba la iehnoh u Saleng A Sangma uba la jop kum u MP ka Tura.
U Dr. Mukul u la ong ula peit pyrman bha ia ka jinglong jingman ha Gambegre konstitwensi, bad ula iohi ba ki tnad sorkar baroh kila hiar sha constituency hapoh ka jingbthah ka party kaba don ha ka bor.
U Dr. Mukul ula kynnoh ba kane ka dei ka jingleh kutlad jong ka NPP kaba don ha ka bor ban jop ia ka elekshon, hynrei kan ym jop satia.
Ka All India Trinamool Congress (TMC) kala rai ban pynieng ia ka MDC ba marwei ka GHADC ka Sadhiarani M Sangma kum ka kyrtong ha ka elekshon shiteng samoi jong ka Gambegre Constituency.
Ka NPP ka la rai ban pyniakhun ia ka lok u Myntri Rangbah u Conrad K Sangma ka Mehtab Chandee Sangma.
Tuid ka tin ka NPP sha Gambegre, phi sam tin kaba thied ne kaba na ka skhim, kylli u Dr. Mukul
