Shillong: Ka seng ki nongniah bad ki trai kali kit shyiap kit maw, ka Local Truck Owner and Driver Association ka la ong ba katba ym pat lah ban iakren markhmat bad u Myntri Rangbah ka Jylla, ban pynbeit ia ki jingeh, ka Sorkar kam dei ban khang ia ki par maw par shyiap namar ka ktah ia ka jakpoh jong kiba bun kiba trei ia ka kam.
Mynta ka Sngi ki trai bad nongñiah kali kit shyiap ki la iakynduh ha nongbah Shillong ban pyrkhat kumno ban iaid shakhmat hadien ba ka Sorkar ka la pynmih kyndon ia kiba trei par maw par shyiap bad kiba kit ia kitei ki mar.
U Bah Egenstar Kurkalang u la ong ba ka jingkhang ia ki par maw par shyiap bad ki kali ban kit kan ktah shibun ia kiba im na katei ka kam, bad ym tang katta kan ktah ruh wat ia kiwei ki jingtrei kynthup ia ki jingtrei jong ka Sorkar bad kumjuh ia ki scheme sorkar kum ka PMAY bad kiwei.
U la ong ba ka kynhun kam pyrshah ia kita ki kyndon ba ka Sorkar ka thmu ban buh, hynrei donkam ban iasyllok lang khnang ban wanrah ia ki aiñ ki ban nym ktah ia kiba rit, khamtam ban lait na ka jingkiew dor.
U la ong ruh ba katba ym pat dep ban iakren pynbeit ki bor ba dei khmih kim dei ruh ban pyndik ia ki kali kiba kit ia ki mar ki shyiap, namar kan ktah ia u duk u suk.
Sorkar katba ym pat lah ban pynbeit wat pynthut ia ka kam kit maw kit shyiap: Egent
