Shillong: Ka NPP kaba jop 26 ngut ki MLA ha ka elekshon 2023, ka la kiew syndon shaduh 31 ngut ka jingdon ki MLA ha ka iing dorbar kaba 60 ngut hadien shi snem tam.
Mar ia kut ka elekshon hadien katto katne bnai, ka NPP ka la ioh MLA 2 ngut hadien ba la wan iasoh na ka PDF bad mynta hadien shi snem tam, ka la kiew sha ka 31 ngut hadien ba la wan iasoh sa lai ngut ki MLA na ka Congress. Kane ka jingioh ia ki MLA kiba la jop lypa, ka mut ba ka NPP ka la lah ban ialam ia ka sorkar marwei ha ka ïing kaba don 60 ngut ki MLA.
Haba kren ha ka jingialang pdiang burom ia ki 3 ngut ki MLA ka Congress mynta ka sngi, u bah Prestone Tynsong uba dei u President ka NPP Meghalaya u la ong ba ka jingwan iasoh jong ki 3 ngut ki MLA ka Congress, ka dei ka jingkyrkhu kaba na sha lyndet jong u nongseng ka NPP, u Purno A Sangma bam kwai ha duwar u Blei.
U bah Prestone u la ong um ju khmih lynti ba ka NPP kan jam sha u numbe jadu ban poi shaduh 31 ngut ki MLA ha kane ka khyllipmat hadien ka jingshah kynthah bad shibun ki diengpynkiang.
Ula kynthah ia u President ka MPCC u bah Vincent H Pala uba la ong ba ka Congress ka lah ban leit sha Supreme Court ban khang lad ia ka jingthied ka NPP ia ki MLA. U bah Prestone u la ong ba ka NPP kam tieng ban iakhun sha Supreme Court ruh lada ki kwah ban leh kumta.
Na madan ha madan, kiew ka jingbun paid ka NPP sha ka 31 ki MLA
