Shillong: Ha kane ka juk kaba treikam bha ka social media, khamtam ka Youtube, Facebook, Instagram, ka X bad kiwei, la iohi ba ki paidbah ki ioh lad bha ban ai ka jingsngew jongki halor kano kano ka khubor kaba mih lyngba ka comment section.
Kawei na ki party kaba shah kren shah kynthah bha ka dei ka NPP, kaba ialam ia ka sorkar MDA-1 bad MDA -2 ryngkat ka jingdon lang kiwei ki party. La iohi ba man ba mih kano kano ka khubor kiba dei shaphang ki MLA, ne ki MDC jong kane ka party ne jong kane ka sorkar, ki briew ki kren kynthah beit ban kynnoh laiphew jait ia ka, bad ia ki nongialam jongka.
Hynrei katba nang bun kiba kynthah, ki MLA, MDC pat ki la nang bun kiba leit pyniasoh sha kane ka seng sain pyrthei.
Tang hadien katno katno bnai, kawei ka seng ka PDF kaba don ar ngut ki MLA ka la leit iasoh noh sha ka NPP da kaba pyndam ia ka party. Hadien kane, mynta la mih sa ka sur ba ki MLA ka Congress kiba la shah beh seng, ki la iasoh noh bad ka NPP kaba ialam ia ka sorkar. Shwa ia kane, ki MDC ka Congress kynthup u MDC ka Mawkyrwat u bah Carnes Sohshang, u MDC ka Mairang-Nongkhlaw bah Batskhem Ryntathiang kila leit iasoh bad ka NPP nalor kiwei pat kiba la iasoh shwa ka elekshon MLA ha 2023.
Dang shen, shwa ka elekshon MP, u MDC ka Nongkrem bah Lambor Malngiang, u MDC shu sieh ka KHADC u bah Bindo M Lanong kila kyrshan ia ka Executive Committee kaba ialam u bah Pyniaid Sing Syiem kum u CEM na ka NPP.
La mih bun ki kynthoh ruh ia ka UDP, HSPDP kiba la khein kum ki party kiba shu pan jaka lem na ka NPP ban ioh doh phret lang ha ka sorkar.
Lada shim ia ka jingmih ka result ha ka MP elekshon, ki paidbah ki phai khmat sha ka seng thymmai ka Voice of the People Party (VPP) namar ba u kyrtong jongka, ula ioh vote palat wat lada khein lang ia baroh ki vote jong kyrtong kiba iakhun.
Ha ka politik ym lah ban iathuh lypa namar ba ha kaba khadduh ka shong ha u paidbah ban rai.
Kat nang kren beiñ ki paidbah, nang bun ki MLA/MDC ba rung sha ka NPP
