Shillong, Nailar 16: Ka seng NPP kaba ialam ia ka sorkar MDA-II ka lah ban kiew ka jingbun paid ki MLA sha ka 30 ngut ha ka iing dorbar kaba 60 ngut ki MLA lada ki ar ngut ki MLA ka Congress kiba la shah beh seng kata, u bah Gabriel Wahlang, bad bah Charles Marngar kin leit ban iasoh.
Katkum ka khubor, ka Congress ka la beh seng noh ia ki mynta ka sngi, halor ka nongrim ba kine ki MLA kila leh khlieh shrieh ban leit ialeh ieit sop sop bad ka sorkar MDA, kaba ialam ka NPP. Shwa ia kane, kala don ka jingher ka khubor, ba lai ngut ki MLA ka Congress, u bah Gabriel Wahlang na Nongstoin, u bah Charles Marngar na Mawhati bad u Dr. Celestine Lyngdoh ki lah ban leit iasoh noh sha ka NPP.
Da ka jingbeh seng ka Congress, ka la paw shai mynta ba kine ar ngut ki MLA kin pynkhreh ban leit rung noh sha ka NPP shen.
Ka la don ka jingiakren madan shane shatai, ba u myntri rangbah u Conrad K Sangma un pynrung shuki myntri uwei na ki MLA ka Congress lada kin iasoh noh bad ka NPP. Lah ban kdew, ba ka NPP ka dei kaba donbok tam ka party namar ba hadien ba la kut ka elekshon, ka la ioh ban tan noh 2 ngut ki MLA ka seng PDF kata ia u bah Banteidor Lyngdoh na Mawkynrew bad ia u bah Gavin M Mylliem na Sohra.
Yn kiew ka jingbun paid ka NPP sha ka 30 ngut, lada iasoh 2 ngut ki MLA ka Congress
